En el pasado las maalles teniyan un sonido propyo i distinktivo. Las demanyanas, los vizinos yamandosen unos a los otros de las ventanas, las rizas de los ijikos djugando en la kaye… Kada boz se entegrava en la vida kotidyana de la maalle i pasava a formar parte del diya en dia. Agora en munchas maalles reyna el silensyo.
Las personas estan bivyendo en edifisyos mas serkanos entre si, ma estan mas distantes de las bozes suyas.
Kuando eramos chikos, la kaye no era solo un kamino de salir de la kaza. Era la vida mizma.
Las tadres las madres gritavan de las ventanas en dizyendo: “Ayde vini a kaza”.
Si la puerta de una kaza se avriya, la vizina den frente demandava si ay una koza negra u buena. La konversasyon entre dos personas se alargava, i los ke pasavan de aya deshavan un saludo a la konversasyon.
La boz de los ke vendiyan zarzavates, simites, dondurmas se oyiya de leshos i los ijikos kuando oyiyan akeyas bozes saliyan koryendo a las kayes.
Oy, kon el telefono estamos dando komandas en unos kuantos puntos. La komodita pujo.
En el pasado, saviyamos ken esta hazino, ken troko su kaza i paso a una mueva kaza, si la luz de una kaza no estava asendida unos kuantos dias, mos merikiyavamos.
Agora no savemos ken esta morando al lado de mozotros.
Mos estamos keshando del bruido, ma mos estamos olvidando ke muestra verdadera falta es no oyir la boz de la vida. Siguro ke todo en el pasado no fue perfekto, un saludo, enteresarse por el byen estar del otro, u una konversasyon kurta en la puerta atava a las personas.
Oy estamos vyendo ke las kriyaturas no estan djugando mas en las kayes, las relasyones entre los vizinos se aminguaron. Es verdad ke la teknolojiya mos esta fasilitando la vida. Ma, la fasilita i estar serka no es la mizma koza. Embiyar un mesaje, a vezes no esta tenyendo el lugar de sonar una puerta i demandar “Komo estas”?
Puede ser, para akodrarmos las bozes olvidadas de la maalle, no nesesitamos grandes trokamyentos.
Saludar un vizino del apartamento, ayudar a un aedado para transportar su chanta pezgada, avlar dos palavras kon los komersantes de muestra maalle puedriya ser un empesijo.
La maalle no es un lugar solamente ande los edifisyos estan unos al lado de los otros. Es un lugar ande las personas se ven i se renden kuento unos de los otros, es el lugar ande se demanda por su vizino.
Akeyas bozes mos kontan, mos ensenyan lo ke sinyifika bivir endjuntos.
Antes 50 anyos, Estambol era una sivdad de proporsyones muncho mas umanas, antes de los anyos 80 i 90. En akeya epoka, las kayes no estavan dominadas por el bruido de los motores aktuales, se oyiya las bozes de los vendedores ambulantes.
El bozadji, el eskidji, el afilador de kuchiyos, el vendedor de yogurt, el kolchonero (Hallach), el kimurdji i munchos otros…
