En kada okazyon vos konto ke me plaze kaminar i viyajar. En tornado vos eskrivo i partajo mis aventuras kon vozos. Enverano me plaze ir a las izlas de Gresya. La mar, la muzika, los bayles, las komidas son de ennamorar. Kada enverano me plaze ir a diferentes izlas. Fin agora me fui a las izlas Thassos, Chios, Lesvos, Samos, Mykonos, Santorini, Kriti i Leros. En la Gresya me fui a Thesaloniki, Halkidiki, Alexandropolis i Athena. De aki ya se ve ke me plaze irme a este paiz i sus sivdades. La mar es komo vidro. Di ke parese a un akvaryum. Los kazales son muy ermozos. En los kazales las murayas, los molinos de ayre, las Iglesiyas, las kalejas son muy simpatikos. En los restorantes komes komidas. No komes kazik. Los mezelikes komo salata grega, Tzaziki, Sağanaki, Uskumri fume, i produktos de mar son de chupar los dedos. Los pishkados vienen en vezes asados o fritos. Komo keresh. El Raki se yama Uzo. A mi me plaze el Barbayani. Las noches en las tavernas en komyendo ay muzika ke kantan en Grego. Kasapiko i Sirtaki son los bayles de la muzika ke se tanya kon Buzuki. Vide en baylando ke estan rompyendo chinis. Le demandi a un Grego ke estava en la meza al lado de mozotros, ke sinyifika este ritual de en baylando romper chinis. Me disho ay unos kuantos sensos. El primero es ke viene del tiempo antiguo, para arondjar las neshamas negras. I por nazar. Sigundo para amostrar ke estan muy orozos. El treser es para amostrar ke no estan dando emportansa a las paras; estan bivyendo el tiempo ke esta orozo. Otruna konseja ay, me disho. Munchos anyos antes en un boda salyo pleto entre las famiyas. El viyejo de la famiya salyo en medyo ande se bayla. La echo la kupa ke estava bevyendo vino. Disho las kupas ke se rompen ma los korasones ke no se rompen. Ansina eskapo el peleyo i empesaron a baylar endjuntos Sirtaki. El mas ke me toko al korason fue la konsejika ke desho al final. Ya savesh ke bivimos un kavzo ke se yamo Mubadele. Muy triste una emigrasyon. Deshimos en indo las kazas, los echos, las eskolas, los simeteryos i los rekuerdos i memorias. No es kolay. Es muy triste un kavzo. En esta emigrasyon ovligatoryo, las ijikas Gregas pensaron si se yevan allado el ashugar, se pueden kazar mas kolay. Ya se save ke antes la madres aparejavan ashugar a las ijas. Kuando arivaron al porto de Pireo, se avyo las kashas ke trusheron, vieron ke kozas komo chinis de porselen, kupas de kristal ets. en el kamino en vinyendo se rompyeron. Todo lo de vidro. Esto ke vieron las ijikas empesaron a yorar. Empesaron a kantar kantikas tristes. Esto ke oyeron los ke moravan en las kazas de Pireo salyeron a la ventana para mirar ke esta afitando, kualo es estos yoros. Kuando se ambezaron el sujeto i eyos empesaron a echar de la ventana abasho los chinis i las kupas. Para ke entyendan ke no estan solos, ke estan tristes komo eyos. I la dolor estan partajando. Despues de akel diya todo modo de alegriya i tristeza rompen chiniz i kupas para dizir, las felisidades i la tristeza estamos sintiyendo. En la taverna en baylando i yo echi la kupa de la mano en gritando Yassu Filos.
