La pensia…
Para algunos, una liberta esperada durante anyos, para otros sinyifika ke la vida se ralentizo.
La ora ke sona se emmudese, la adjile ke tenemos para ir al echo se termina, el senso de los lunes en el kalendaryo se troka.
La persona se dize: “Mas no esto lavorando, esto libero”.
Ma, veramente no estamos lavorando?
Puede ser la pensya es; de trokar la forma de lavorar…
La persona kere krear, no es una oja del kalendaryo ke kalkula la edad. Mos ambezamos un ofisyo a lo largo de los anyos. Ganamos una eksperiensya. Azemos errores, dekuvrimos lo ke es korekto, konosemos djente i mos ambezamos un poko mas, sovre la vida.
Despues un dia mos azemos retretados, i se espera ke serremos la puerta a toda esta eksperiensya akumulada.
La verdadera kestyon es esta: No es: “Kualo va azer despues ke va ser retretado?” “Kon ken va kompartir de agora en delantre lo ke me ambezi a lo largo de todos estos anyos?
Agora la pensya tyene un sinyifikado diferente.
Oy, munchas personas estan lavorando despues ke se izyeron retretados. Algunos por razones ekonomikos, otros por no estar sin azer nada, i algunos porke se keren sintirsen parte de la vida. Porke lavorar no es solo ganar paras. Lavorar, es tener un buto para alevantar las demanyanas, es alkansar a uno ke te esta asperando.
Es sintirmos ke semos util, produsir una koza, i mostrar kamino a uno ke tyene menester.
Ademas, en una etapa avansada de la vida, la grande aktivita de una persona ya no es solo su tyempo, sino su eksperiensya.
No puedemos alkansar el ritmo de los mansevos.
Un mansevo puede usar el komputer mas presto ke mozotros, ma kale anyos largos para ambezar la vida,
ser pasensyozos, entender las personas… Kuando se deve de dizir una palavra, saver kuando es mas apropriado de guadrar el silensyo. Estas kozas no se ambezan fasilmente. Por esta kavza lavorar despues de estar retretado, no deveriya sinyifikar kompetir kon los mansevos. Por kontraryo, deveriya sinyifikar ke las jenerasyones se ambezen unos de los otros.
Enviejeser no sinyifika renonsyar a krear. Al kontraryo, la persona a vezes kuando es retretado, empesa a konoserse verdaderamente a si mizmo por la primera ves.
“Kualo kero azer?” es la kestyon ke se demanda de si para si. Puede ser es la epoka la mas ermoza de la vida, en el ke empesamos a bushkar la repuesta de esta kestyon.
La pensya puede ser la serradura de una puerta. Ma no es la puerta de la vida. Puede ser, un echo muevo, puede ser konsultante, puede ser voluntaryo; puede ser eskrivir un livro, ensenyar, produsir ets…
Su forma puede trokar. Ma la kontribusyon de una persona a la vida puede kontinuar. Porke, kuando una persona se enviejese, nesesita retirarse de syertas kozas.
De paniko, de la kompetensya innesesarya, de lo ke otros puedan dizir.
Ma, no kale retirarse de la vida.
I puede ser la pensya verdadera, no es el dia ke deshimos el echo, empesa el dia en ke ya no mos kedan palavras ke dizimos a mozotros mizmos, ni al mundo.
Fina akel dia? La vida esta kontinuando.
Puede ser agora, de una manera muncho mas sinyifikativa.
“Uno no deve de retirarse de la vida” es, la idea prinsipal de esta eskrita.
