El mez de ilul es mez de Selihot, mez de demandar pardon.
Ke ermozo ke es kuando atorgas un pekado ke izites, kuando te ekskuzas ke rompites un korason u ke izites un yerro. Kreygo ke la siensya de psikolojia tomo munchas ideas de la Tora. Porke atorgar un pekado u un yerro es kitar el tosigo de aryentro del korason.
Roshashana. Ke kere dizir?
Roshashana, por siguro ke todos ya savemos ke rosh es kavesa i shana es anyo en ivrit. Ma ke sinyifika este byervo?
Sigun el kalendaryo ebreo los dos primeros dias del mez de Tishri, son los dias de djuzgo, dias de sonar 100 vezes el shofar, de konfesar los pekados i arepintirse de lo ke izimos entre el anyo.
Ir a la keila, orasyonar, oyir shofar, todo es muy ermozo ma lo mas ermozo es las tradisyones.
Un djudyo, seya relijyozo u no, nunka no fuye de las tradisyones. Sovretodo noche de Roshashana todos tyenen en sus mezas dulse de mansana, miel, kavesa de peshkado i por siguro koftikas de prasa.
Munchas mujeres no seya ke no kede, ya empesaron a eskaldar las prasas de diyas antes. Esto se konta en las mezas de djugar i en la plaj de Anadolu Klübü, ken i ken va egzajerar kuantos kilos eskaldo.
A mi me demandan dande topas tantos sujetos i mos azes riyir. Vos djuro ke me vyenen fin al pye sovretodo enverano.
Un diya antes de abashar a la sivdad, tomi el livro i me fui a la plaj ma enposivle de meldar porke djusto al lado de mi aviya una konversasyon muy importante.
“Yo ya eskaldi 5 kilos”
“5 kilos? A ken abasta; yo tengo 20 personas a komer a lo manko 10 kilos; ya esto bolada!”
Bueno ke no so vizina de esta damma ke eskaldo 10 kilos porke la golor no es muy famoza ma el komer no ay presyo.
Semos un puevlo ke mos plaze egzajerar. Komo me plaze ironia i azer shakaikas me plaze observar la djente, sin kerer oygo syertas palavras. Por egzempyo ke dishites oy ay muncho ayre, ya vyene una repuesta,
“Ayre? semana entera va azer luvya!”
U byen esto kon abashada,
“Abashada? Aze atansyon mira ke no seya puntada!"
Ten pekados i dize, la situasyon ke se va azer? De vista,
“Muy negro, aki no se bive!”
A la noche ya la ves komyendo en el restoran i bevyendo raki.
Si se avre kestyon de la politika todas mos azemos ministras de komerso, de agrikultura i por siguro de ekonomiya.
La verdad dizir, la kestyon de la ekonomiya no esta shaka de burlar, si egzajeran tyenen razon porke los presyos ya egzajero bastante.
Todos los ombres kon los telefones en la mano mirando el presyo del dolar, ken kon la kara preta, ken aziendo kuentos, ken dizyendo ke va suvir a 60.
Terminare kon una chika anekdota:
“En el tyempo de el Imperyo Otomano un rey muy kruel al puevlo metyo impuestos muy fuertes. I kada diya sin adjidear lo estava pujando.
El puevlo muerto del sar ke se estan emprovesyendo i kualo van a azer.
Un dia el rey le disho al vezir, trokaremos de sayo i saliremos a la sivdad, veremos el puevlo ke azen i ke avlan por mi.
El vezir por siguro aksepto, se vistyeron vistidos de sako salyeron a kaminar. Supito ven ke el puevlo esta en las kayes kantando i baylando kon grande alegriya. El rey ya se mareo, ke esta afitando, yo ke meti tantas taksas fuertes; esta djente al lugar de yorar se metyeron a baylar?
Va demandales deke estan este karar de alegres; boda ay?
El vezir abasha del kavayo i demanda en gritando,
“El rey metyo tantas taksas ya vos kedo gana de kantar i de baylar?”
Sale un djudyo nasido de vyernes i le responde:
“Sinyor porke mas de baylar i kantar no mos kedo nada.”
Seyamos eskritos en livros de vida, kon sanedad, kon atslaha, kon pas en el mundo i en el paiz, amen.
