En enverano los diyas son largos, por esto tenemos mas muncho tiempo para meldar i para pensar sovre lo ke meldamos.
Antiyer, estuve delantre mi libreria i eskoji un livro ke ya avia meldado antes. Era el livro de İlber Ortaylı, “Bir Ömür Nasıl Yaşanır?” “Komo bivir una vida?”
Mientras estava pasando las pajinas, torní a mirar, a las linyas ke avia sulinyado antes. Ay unas frazes ke, despues de anyos, tokan al korason de otra manera.
En los ultimos tiempos, en las kayes, esto remarkando unas fachas de mujeres ke estan paresiendo, mas unas a las otras. Tienen egzaktamente las mizmas karas. Las sejas enriva de sus ojos, los mushos godros i bien kolorados. Las karas ufladas. Los parparos bien largos, postizos. Las unyas de kolor a kolor i estas postizas. Esto es un trokamyento eksesivo. No tengo dinguna palavra a los chikos trokamyentos ke son estetikos i ke azen solo un briyo. Lo ke no entiendo en estas mansevas, para azersen mas ermozas, estan peryendo sus fizyonomiyas. No tienen sus ekspresyones.
Ilber Hoca lo eksplika tan ermozo:
“Se save, ke los ke fueron ermozos kuando eran mansevos, kon el trokamiento fiziko verso la vejes, piedren la ermozura ke tenian. Ma ay personas ke, en sus medyanos de edad, en el kamino de sus vida, empesan a ser interesantes i otra manera de ermozas. Porke respondieron kon sus emosyones i su razon a lo ke bivieron en la vida.
Porke izieron lavorar sus konsiderasyones.
Porke se interesaron i se okuparon de los problemes i de los desekilibros del mundo.
Las rayas de sus karas trokaron a una mas grande elegansia i maduridad.
Despues kontinua:
“Si una persona en su vida, se penso, se entristo, se namoro, vido la vida i bivyo;
si una persona se influenso de las maraviyas de su vida o paso unas situasyones dezmazaladas i se le apreto su korason munchas vezes, esto todo se refleta en la kara de estas personas.
Se ve en la kara del ombre i de la mujer. El ke no izo estas kozas no tyene ninguna ekspresion en la kara. La kara de la persona se puede meldar komo un livro.”
Ke verdad…
En la kara de una persona está la istoria de la vida ke bivio.
Las rizas, los amores, las desepsiones, las amistades, las kuriozidades, los viajes, los livros ke fueron meldados, la muzika ke fue oyida, las alegrías i las dolores ke fueron bividas… Todo esto, kon el tiempo, se asenta en la kara de la persona.
Talvez por esto las karas de los marido i mujer ke bivieron munchos anyos djuntos se van paresiendo kon el tiempo. Se riyen a las mizmas kozas, afrontan djuntos las mizmas tristezas, partajan las mizmas emosyones i preokupasyones. Se mesklan en la vida uno del otro i deshan markas en la kara del otro.
Algunas de las rekomendasyones ke Ilber Hoca da a los mansevos por la kestyon “Komo se bive una vida?” son en realidad sovre esto:
Aleshavos de la monotonía. Interesavos en los otros. Melda. Ama. Viaja. I aze esto todo kon savor, kon dezeo.
Porke lo ke una persona bive, tadre o demprano, se refleta en su kara.
Entonses, enviejeser ermozo es inchir el interior de tus rayas kon ermozas memorias.
De verdad son tan importantes las rayas de muestra kara, las manos ke se arrugan, i talvez la desfuersabilidad de muestras rodiyas? La edad es solo un numero. No mos emporta.
Si tenemos amigos ke mos pueden yevar mas adelantre de mozotros, si ayinda sentimos la emosyón de estudyar una koza mueva; si tenemos dayinda la esperansa de ambezar kozas muevas…
Yo digo, la kara no es solamente una kara, es una vida entera.
