Vos kontare lo ke me akontesyo la semana pasada.
La noche despues ke mos echimos, kije irme al banyo. Estava una i medya de la noche. En alevantando, me arezvali de la kama i me kayi en basho. Grasias al Dio no me afito nada ma no me estava puedyendo alevantar. Ni mi marido no pudo alevantarme. Ke ivamos azer? Kedi en basho. Este anyo no vino dingun vizino. Estavamos solos en la kaza. Salyo mi marido a la puerta de kaza para ver si alguno va pasar para ayudarmos. Aparte de gatos no aviya dingunos por la kaye. Dishimos telefonaremos al espital para ke mos manden una ambulansa. La ke salyo al telefon, demando si tenemos alguna rotura o alguna hazinura o kriza de korason. Dishimos “no bendicho el Dio no tengo nada mas ke me kedi en basho, no me esto puedyendo alevantar”. La repuesta fue ke no pueden vinir. Si kero absolutamente ambulans, es ke mos van a yevar al espital de Kartal para azerme check-up.” Dishimos, alora mandamos una persona, ansina va kedarme en basho? No puedemos ayudarvos disheron. A la fin telefonimos al guartelano, el guartelano se opero de los ojos tiene dolor disho ke no puede vinir, la mando a la mujer. La mujer es un fideyo de mujer, a mi me va alevantar? Yo so un poko remetidika (para no dizir ke so godra) Ke seya, un ayudo. Vido ke ni eya no me va pueder ayudar, lo yamo a un sovrino ke mora muy serka de mozotros. Ya vino sano ke este un bazlambach de mansevo. Me tomo komo una pluma, me alevanto de en basho. Lo bendishimos de alma i de korason. Se fueron i yo me echi de muevo, despues ke pasi una sehora buena. Un amigo me disho ke kaliya telefonar a la polisiya, pishin viniyan. Ke mos kede en el meoyo, i ke no los tengamos mas menester en oras pretas. Amen. Anyada buena i dulse ke tengamos, kon salud buena i todos djustos.
