En 1955, kada tadre en las klasas de los kindergartenes en la Amerika akontesia una koza maraviyoza.
A la una, las luzes se amenguavan.
Un pikap inchiya la sala kon una muzika dulse i kalma.
Vente kreaturas chikas suviyan kayadikas a sus kamikas, se kuvijavan kon sus kuviertas i se repozavan.
Por jenerasyones de kreaturas ke se engrandesieron en los anyos 1950, 1960 i al empesijo de los 1970, el repozo de la tadre era tan importante komo ambezar a meldar o kontar numeros.
Nunka se konsiderava komo tiempo piedrido.
Las profesoras ya saviyan ke las kreaturas de sinko anyos no eran echas para pasar kada minuto ambezando, azyendo prezentasyones o sigiendo instruksyones.
Savian ke los meoyos mansevos teniyan menester de kayades.
Los puerpos mansevos teniyan menester de repozo.
Las imajinasyones mansevas teniyan menester de tiempo para estar inaktivos.
Aviya kreaturas ke se durmiyan presto.
Otras kedavan espyertas, mirando komo baylava el sol sovre el tavan de la klasa o sonyando kayadikas de aventuras imajinarias.
Mezmo akeyas ke no puediyan durmirsen, se ambezavan una koza valoroza.
Se ambezavan ke bivir mas avagar era parte de engrandeser.
Ke kedarse kayado tenia su proprio buto.
Kon el tiempo, todo troko.
Kuando las eskolas dyeron mas emportansa en el sukseso akademiko, el kindergarten se intereso mas en la lektura, egzamenes i rezultados.
Poko a poko, el tiempo de repozo desparesyo.
Los pikapes fueron trokados por komputadores i lisyones dijitales.
Los momentos de kayades disparesyeron.
Las kreaturas de oy pasan a las vezes sesh o syete oras pasando de una aktividad organizada a otra, kon muy poko tiempo solo para aretar.
Munchos edukadores i paryentes se demandan agora deke las kreaturas paresen mas anksyozas i mas kansadas ke antes.
La repuesta es ke mos olvidamos ke las jenerasyones anteriores entendiyan ke
el repozo no es tiempo pedrido.
La kayades no es haraganut.
El meoyo de una kreatura se developa no solo kon lisyones i aktividades, ma tambien kon momentos de paz.
Akeyos repozos de la tadre nunka eran solo para durmir.
Les ambezavan a las kreaturas ke no teniyan menester de ser produktivas kada segundo para tener valor.
Les akodravan ke aminguar el paso era parte del ambezamiento, no lo kontrario de el.
Esta es una lisyon ke mozotros, los grandes, tenemos menester tanto komo oy.
A las vezes la koza mas emportante ke puedemos azer es darmos la mizma permisyon de repozar ke davamos a kada kreatura de sinko anyos en la klasa.
