Ansi ampesa la lektura del livro de los Reyes. La realizasion del orden del Sinyor del Mundo. Meldamos todos los detalyos konsernando la realizasion
de la Kaza Santa, es a Shelomo, ijo de David Ameleh ke fue dado esta misyon jigansteska. (Monumental). Si meldamos kon grande entereso la vida de David, okupado kon konkestas, gerras, i la importansia ke asiguro su puevlo establisado en Yerushalayim komo Kapital. El Templo fue fraguado por su ijo Shlomo, esta misyon fue defendida a David por sus pekados. Komo el pekado de Betsheva, ke kontaremos otra vez.
Shlomo ampeso a konstruir el Templo en el mez de Ziv, ke es Iyar, en el kuatren anyo de su Reynado, 480 anyos despues la salidura de Ayifto. Esta data es muy importante porke fue el momento ke enfin la misyon del puevlo se realizo, porke el Egzodo aviya eskapado.
Las tavlas i las piedras para la konstruksyon del Templo fueron mandadas de Tyr por el Rey de Hiram, prontas para la konstruksyon del Templo Santo.
La Mishna mos ambeza ke dengun enstrumento de fierro no se pudo empleyar para la konstruksyon de la Mizbeah, ke es lugar Santo ke alarga la vida kon su Santedad, komo la espada ke no deve de ser empleyada porke akurta la vida.
Shlomo el Rey entendyo bueno su misyon, el fraguo un sentro spiritual ke semboliza la Pas entre todos los ombres i los Reynados del entorno.
Shlomo fue un grande Rey a ken el Dyo de los Sielos aviya dado saveduriya i entendimyento, komo lo dezeyo en sus rogativas.
Mis suetos de Pas i Amor.
