En medyo del ritmo vertijinozo de la vida moderna, todos sintimos la nesesita de refujiarmos en el pasado, espesyalmente en akeyas kayes estrechas ande mos engrandesimos. Mizmo si pasaron munchos anyos, i estas kayes se trokaron enteramente u se desparesyeron por entero, su lugar en muestros rekuerdos kedan bivos komo el dia en ke las konosimos por primera vez.
Bueno, deke akeyas kayes de muestra chikez estan bivyendo aryento de mozotros?
Los psikologos afirman ke las persepyones durante la chikes son muncho mas avyertas en komparezon kon las de la edad adulta. Las kayes de muestra chikes eran otro modo. Las tadres, las madres gritavan de las ventanas: “Ayde ijikos a kaza, es tyempo de komer!”… Ma el djugo era tan dulse ke dingunos no keriyan irsen a kaza.
La kaye era muestra vida. Djugavamos kon el top, saklambach i saltavamos a la kuedra.
Todos se konosiyan en la kaye. Ke ijiko esta ande, ken tyene musafir, ke vizino esta hazino, ken vino muevo al apartamento… Todos saviyamos. Porke el vizindado no era solamente morar uno al lado de otro, era; kompartir, partajar trankilamente le vida del otro.
Un plato de komida se iva de puerta en puerta, en las fyestas las dulsuryas se kompartiyan. Las puertas no se serravan, ma la verdadera konfiensa estava en la konfiensa ke las personas teniyan unas en las otras.
Las kalejas akel tyempo teniyan unas bozes. La boz del simitchi, la muzika de una radyo, el top ke chafteava a la pared, la soneriya de una bisiklet…
Oy, muestras sivdades estan muncho mas ruidozas. Ma lo ke no esta normal es ke, desde ke el bruido pujo, no estamos puedyendo oyir muestras bozes.
Akel tyempo los chikos no teniyan telefones en las manos, ma teniyan en las aldikeras bilyas, kuedra, un djugete chiko u byen bonbones. No se embiyavan mesajes, kuando yamavan “esto abasho, ayde ven djugaremos” el otro se iva.
Oy la vida de muestros ijos se troko enteramente. Los djugos estan en los ekranes, las kayes a kavza del trafik peryeron sus sinyifikados.
Muestros ijos se estan engrandesyendo kon el vizino ke mora al lado en el apartamento sin konoser su nombre.
Puede ser no es solo ke mos estamos eskarinyando de las kalejas vyejas. Es las emosyones, los rekuerdos ke bivimos en estas kayes.
Mos estamos eskarinyando de riyir endjuntos, de asentarmos delantre de las puertas, de demandar komo esta el vizino, de las bozes de los ijikos, de bever un kafe endjuntos i de avlar kon los vizinos.
No son las pyedras, ni los edifisyos, lo ke da vida a las kayes, es la djente.
Puede ser no puedemos trayer las kalejas de muestra chikez atras. Ma, puedemos trayer la kayentor, la senserita i el amor a las kayes de oy. Algunas kayes no biven en las kartas jeografikas, ma biven en el korason umano, en muestros korasones.
I la persona, nunka abandona la kaye de su chikez, simplemente krese i la yeva kon si mizmo.
