Roshashana es el tiempo kuando mos metemos enfrente del Dio, i le rogamos ke muestros dezeyos se realizen en el anyo vinyen. Ma, antes de todo, en primero, le rengrasiamos por todo lo ke mos dio, i le rogamos de darmos sanedad, i fuersa para pueder gerreyar kon las difikultades ke enkontramos kada diya.
El otro diya, meldi un artikolo sovre ‘la realizasyon de muestros dezeyos’ en un periodiko. Vos kero eskrivir un poko sovre este artikolo.
Los obstaklos ke mos impedian de realizar muestros dezeyos, son muestras negras manyas, muestras kreensas yerradas, muestros dezeyos irrealistos, i los defektos de muestros karakteres.
Antes de todo, esta dizyendo el artikolo, kale ke akseptemos ke el Dio mos kreo a kada uno, kon diferentes kapachedades, i ke dinguno de mozotros no es perfekto. Ma, mezmo ke no semos perfektos, el Dio mos dio estas kapachedades para ke las empleyemos. El Dio mos embiya tambien munchas oportunidades para ke las puedamos empleyar.
La persona ke se eskonde de sus defektos, o ke inyega sus defektos, no puede tener objektivos realistos. Si konosemos muestras kapachedades, i akseptamos muestros defektos, akeya vez podemos alkansar lo ke keremos.
Konoserse a si, i kererse bien a si, toma tiempo. En lugar de demandarme de mi para mi, ‘Komo puedo pareser a esta persona ke es tan reushida?’, kale ke me demande, ‘Komo puedo empleyar mis kapachedades, i las fuesas ke el Dio me dio, para pueder realizar mis objektivos’. Naturalmente, el dezeyo ke tengo, kale ke akorde kon mi karakter. En siendo ‘YO’, en siendo pasensioza, i en empleyando mis fuersas, puedo reushir a alkansar mis objektivos.
Reushir a alkansar muestro objektivo de la primera vez, munchas vezes, no es posivle. Munchas vezes mos yerramos, no puedemos reushir. Mezmo Moshe Rabeno, no pudo reushir a kitar a los judios de Ejipto, mezmo ke el Dio le aviya prometido de ayudarle.
Munchas vezes, el Dio mos prova, en permetendomos ke agamos yerros, porke El kere saver ke karar mos estamos kreendo en muestro objektivo.
El Dio mos djuzga segun los esforsos ke azemos, i no segun muestra reushita. En el judaizmo, ‘Reushir es pueder konoserse a si’. Kale ke digamos, ‘Esto azyendo todo mi poder kon mis senseros esforsos, para poder reushir’.
Vos sueto a todos una anyada buena kon sanedad i alegriya, i vos sueto de poder realizar vuestros dezeyos en el anyo muevo.
