Keridos i Keridas, me esto akodrando dainda yo teniya kaji 8 u 9 anyos; estavamos morando en Harbiye. No solo el apartamento, la kaleja era yena de djudyos, paresiya komo una grande sekta akel tyempo. Kuando viniya kavo de avril u mayo, antes de ir a Prinkipo, abashada de Prinkipo fin de augusto era tyempo de piknikes. Kreyo ke todos vos akodrash de esta ermozura, los djudyos se ivan a 3 lugares para piknik: Hünkar Suyu, Chırchır, i Sultansuyu lo ke paresiya ke lo merkaron estos lugares. Antes de una semana u 10 dias empesavan a aparejarsen. Kada famiya aziya unas kozas, ken yalandji dolmas (dolmas mintirozas), ken plaki, ken filikas, berendjena asada, borekes, saladrus, albondigas, tapadas, kezo blanko, domat, pipino, sevoya para salata, borekitas, bulemas, guevos haminados, i los ombres tomavan karne para asar, melon i karpuz, eee si no aviya raki, no se kontava nada. Era todo kon partajar. Keridos kreyevos se alevantava de la kaye diya de alhad 10 u 12 otomobiles, akel tyempo los otomobiles no eran komo oy, eran salon, salamanje 955 Chevrolet u Buick. Kon los chikos en un oto kaji aviya 8 personas u 9. Era un djumbush ke se alevantava de la kaye. Demanyana salir era presto, para topar lugar ermozo. En primero tomavan del Sarıyer börekchisi borek kilos i kilos kon asukar, para dezayuno (me kayo las bavas) i kuando viniyamos al kampo de piknik, en primero se aparejavan los lugares de asentar i empasava el dezayuno i de aya tomavan chay. Dospues del dezayuno, las mujeres presto empesavan a aparejear las mezas de lenyo ke mal te kere (este modo diziyan) i de los ombres uno u dos personas empesavan aparejear lumbre para asar, i los otros ombres se asentavan a djugar u tavli, u bezik. I mozotros korrre detras del top, i las ijikas djugavan kon las kuedras. Las madres kon los padres mashallah eran muy silensyozos. Una gritava, Janti los pirones ande estan, la otra gritava, Klarrraaa los panes, Süzan dame las domates para salata, de otra parte, mira shans ke tyenes Cako dos vezes dü sheshes echates mira mazal, aydeee desha la avlastina mira karta ke te vino İzak, te paresiya ke el mundo de djudyos estan aki este kadar de patirdi. I kuando vino la ora de komer, era otra ermozura en komyendo kantikas, konsejas, riyir i burlar, los vazos de raki u de bira se alevantavan para sanedad, para alegria, i para esperansas
buenas. Dospues de komer se aziya un kave ermozo en la lumbre, ke akeya golor ermoza saliya a kaminar el kampo entero. Ken durmiya debasho de un arvole, u ken asentado en una shezlong ronkando.
Syempre ke estemos sanos, orozos, i kon buenas esperansas!
