Keridos i keridas, vos saludo kon grande eskarinyo.
Oy en lavorando estava oyendo kantikas, kantikas latinas. Dospues ke oyi dos tres kantikas, tomi el kalem en la mano, i empesi a eskrivir. Mira lo ke salyo en medyo.
Esto kaminando enriva de una kuedra, dura i fuerte. Sin mirar atras, i sin mirar al syelo, de otra parte el ayre esta asoplando komo un chuflete. Esto bushkando mi kamino, sin espanto, en baylando kon la vida, i sin saver la fin. Paso kon paso esto kaminado kon balansa, desfiando a la vida. El fin de la kuedra no se esta viendo, por esto azer dikat es muy importande, i balansa para parvenir.
Me parese ke en la kuedra, la vida es kaminar, syempre sovre una kuedra, a vezes ay alegriya, a vezes ay dolor, entre el syelo kon la tyerra. Si la vida me sakuda komo una savana, akel tyempo yo me detengo al korason, i lavoro para kedar en pies enriva de la kuedra. Todos mos ambezamos kayendo un poko, para alevantarmos kon mas fuerte, paso paso sin mirar abasho, kon grande esperansa, i kon grande kreensa.
Amigos kuando oyi las kantikas, dishe de mi para mi kale ke eskriva unas kuantas linyas porke las kantikas estavan dizyendo ke un ombre estava kaminando enriva de la kuedra i estava azyendo dikkat para no kayerse. I yo lo kompari kon la vida es lo mizmo syempre; kale azer balansa para todo, para no kayer, i no peryer la esperansa para alevantar. Malorozamente todos estamos azyendo el mizmo yerro, sin pensar en el futuro estamos bivyendo, i kuando estamos peryendo, akel tyempo mos esta vinyendo el meoyo en si. Por esto en la vida la balansa es muy importante, komo kaminar enriva de la kuedra.
LA VIDA ES UN REGALO, EN EL KUAL SE APROVECHA.
Vos abraso kon amistad, i kon sanedad
