En el pasado, saviyamos dizir mersi mizmo por un chiko djesto de kerensya ke teniya el den frente por mozotros. Kuando se dava una kupa de agua, kuando un echo se fasilitava, dizir “Grasyas”, era una forma de amabilidad, ke formava parte del kurso natural de la vida.
Oy en diya dizir mersi, es una de las palavras ke se perdyo silensyozamente de muestra vida. La vida moderna esta muy akosada. Todos estan koryendo a un lugar para pueder abasteser al nesesaryo. Todos estan okupados, porke tyenen muncho echo, tyenen de responder a miles de mesajes, deven de mirar a munchas notifikasyones.
Puede ser, mos olvidimos de notar los chikos djestos de amabilidad ke tenemos los unos kon los otros.
Para rengrasyar al den frente no tenemos menester de frazas largas. A vezes, basta dizir “Mersi”. Dizir mersi en mirando aryento de los ojos, puede azer ke una persona se syenta alegre durante el dia entero.
Porke, Grasyas, no es simplemente una fraza de korteziya.
“Ya te vide. Ya noti lo ke izites. Esto valorizando tu esforso”.
Kale remersyar, a la madre ke aze toda su vida munchos sakrifisyos, a un padre ke da el apoyo silensyozamente a sus ijos, a un vizino ke sona muestra puerta i mos demanda: “Tyenes menester de una koza?”.
Puede ser, ke estamos konsiderando el amor, el tyempo, el esforso i la atansyon ke la djente mos esta dando, komo si ya tuvyeramos derecho a eyos.
El telefon esta sonando, no estamos dando repuesta.
Mos esta vinyendo un mesaj, solamente lo estamos meldando. Uno esta azyendo una koza por mozotros, estamos pensando, “Lo deviya de azer”.
Despues un dia el telefon no esta sonando mas. Akel mesaj no esta vinyendo. Akeya persona no esta mas allado de mozotros.
Akel tyempo, estamos pensando a los Mersis ke no dishimos en su tyempo, ke eran muy valutozos. Puede ser, es el tyempo de ambezarmos, a dizir mersi de muevo. Devemos de ensenyar a muestro ijos i ijas, no solo la reushita, sino tambyen la gratitud.
La persona ke remersya, ve el esforso del den frente.
El rankontro, por otra parte es uno de los puntos de partida mas emportantes de las relasyones umanas.
Una palavra de agradesimyento a vezes alivyana los sentimentos umanos, a vezes enfortalese una amista.
Ademas remersyar no mos enchikese. Por kontra, aze ke una persona se engrandeska.
Oy pensaremos a una persona ke mos aze byen en muestra vida. Un aliado… un vizino… un profesor… un myembro mayor de muestra famiya… i le diziremos una fraza ke no le dishimos fina oy.
“Me alegra tanto tenerte. Grasyas por lo ke trayites a mi vida”.
Algunas palavras paresen ordinaryas kuando se prononsan. Ma kon tyempo entendemos, ke algunas palavras son, en realita, tan valutozas komo toda una vida.
Puede ser, en una epoka ke avansa tan rapido, uno de los regalos mas ermozos ke puedemos azermos es muy fasil: “AGRADESER”
