Oy vos kije eskrivir una konseja ke meldi, i ke me plazyo i kije partajar kon vozotros. Aviya un merkader, los echos se fueron por abasho avagar avagar i estava peryendo todo lo ke teniya. Lo ke estava perkurando no se estava enderechando. Un tiempo era muy riushido i riko, agora malorozamente los echos no estavan buenos. Solo teniya devdas i no estava puedyendo ganar para mantenerse. De una parte estavan apretando los kreditores de otra parte la kaza estava asperando pan. Se sintyo mal i no estava puedyendo salir de este kriza. Para tomar un poko de suluk se fue a un parko i empeso a pensar komo puede salir de estos malos diyas. Le vino enfrente un ombre viejo. Le disho kualo tienes, no estas bueno me parese. Esto ya se estava viendo de enfrente. Me keres kontar kualo tienes? Por esto vine allado de ti. I empeso a kontarle el ombre al viejiziko. Despues ke eskapo de kontarle, el viejiziko le disho, yo te puedo ayudarte si keres. Se kito de la aldikera el karne de chek, le demando komo te yamas i le eskrivyo un chek a su nombre. I le disho estas paras son tuyas. Despues de un anyo mos vamos a topar aki, me pagas la devda. I en supito se desparesyo de allado del ombre. Miro al Chek, estava eskrivyendo 500.000 dolares. Miro a la sinyatura, estava eskrito John Rockefeller. El mas riko del mundo por akel tiempo. Se penso, mira maraviyoza koza ke me dio el Dio i me mando a este sinyor Rockefeller. Disho de si para si me ire a la banka, tomare las paras del chek i pagare las devdas. En indo a la banka le vino al tino una koza. Disho este Chek madem es miyo kuando kero lo pudo aboltar a paras. Agora no lo va aboltarlo a paras. Se fue a la botika en koryendo i lo metyo el chek a la Kasha. I se metyo a lavorar. No disho chiko o grande se echo a unos echos ke aviya pensado mas antes. Kon akel moral ke tenia en la kasha el chek de 500.000 dolares, le vino la fuersa de muevo para lavorar. Se fue a los kreditores, les disho dame permisyon unos kuantos mezes mira me diyo sinyor Rockefeller un chek; si no puedo reushir kon este chek vos pago las devdas. Estava lavorando sin tomar suluk dia i noche i en unos kuantos mezes empeso a pagar las devdas i tambiyen empeso a ganar paras. En fin de un anyo se remetyo. Kuando vino el diya ke se iva toparse kon el viejiziko, kito el chek de la kasha i se fue de muevo al parko para darle el chek atras. La ora ke se desidaron el viejiziko estava vinyendo de enfrente kaminando presto presto.
Djusto ke le iva a kontarle los kavzos ke paso i ke ya salyo a klaredad, en supito una enfirmyera vino al lado del viejizoko i lo tomo del braso i lo travo por el bodre. Le disho al ombre espero ke no vos diyo desrepozo este viejo. Porke kada ves se esta fuyendo de la Kaza de Viejos i esta vinyendo a este parko i se esta azyendo konoser a la djente ke es John Rockefeller. Komo lo tomo al viejiziko se alesho de allado del ombre. El ombre kedo mirando al viejiziko kon el chek de 500.000.dolares en la mano. Se empeso a pensar lo ke paso en un anyo. I disho de si para si la koza ke se troko en mi vida no era las paras, era el moral ke tengo la garantiya ke estava el chek en la kasha. Kon este moral me echi de muevo a los echos. El Dyo ke no mos amate la luz del Moral.
