Kuando la persona dize su edad, el de enfrente en primero oye un numero. La edad reel de una persona, no es en las ojas de un kalendaryo, se topa en las vidas ke se tokaron, en las ermozuras ke mos azen akodrar i en las trasas ke desharon.
El enviejesimyento es inevitable. Aunke kada kumpleanyos, puede pareser una oja ke kaye del kalendaryo, en realita es una oja ke se adjusta a muestras vidas. Lo ke importa no es kuantas ojas aboltamos, es lo ke eskrivimos en akeyas ojas. Porke algunas personas se enviejesen, i otras maduran. La diferensya es en lo ke una persona aze kon los anyos.
Algunas personas biven unikamente los anyos de la vida para si mizmo, i otros deshan una ermozura, mizmo chika en la vida de la otra persona.
Karesar la kavesa de un ijiko, sonar la puerta de un aedado, telefonar a un amigo al ke no se bushko anyos largos, demandar a uno “Komo estas?” por kuriozita…
Dingunas de estas kozas no paresen un grande echo.
Ma, a vezes los aktos de buendad chikos, deshan las ermozuras mas profondas en la vida de una persona.
A vezes pensamos a las personas ke estavan en muestra vida. Puede ser ay munchos anyos ke no mos vimos. Mos akodramos de sus karas. Mos parese ke oyimos sus bozes. Una fraza ke mos aviyan dicho, un chiko djesto de amabilita ke tuvyeron, u byen ke estuvyeron al lado de mozotros i mos akompanyaron en un dia difisil, todo esto, esta en muestra memorya.
La kestyon mas sinyifikativa deve de ser esta:
“La vida de ken se abolto a un poko mas ermozo?
Porke pasi por este mundo?”…
La erensya mas presyoza ke una persona desha de detras de si, no es su rikeza, ni sus posesiones, sino el sentimyento ke desha en los korasones de las personas.
Puedriya ser la sonriza de un aliado…
Puede ser una fraza de un amigo ke se akodra despues de anyos largos.
U byen, uno a ken ke no konosemos en absoluto, ke no se olvido un chiko akto de buendad ke realizimos…
Puede ser estos son las kozas ke permanesen la fin de la vida. Por esto, en lugar de guadrar muestra edad, azer kompetisyon kontra el paso de los anyos, puedemos metermos un otro objetivo.
Deshar una trasa mas grande…
Ma no son presizamente trasas grandes i mostrozas.
Trasas reeles ke azen ke la djente diga:
“Ke buena persona era”…
Porke kuando la persona se va de este mundo, no son los anyos ke kedan atras, se avla las trasas ke desho en la vida de los otros.
El sekreto mas ermozo de la vida es esto:
Enviejeser, es lo ke el tyempo mos regala.
Deshar trasa es, lo ke damos a muestro tyempo.
