Ay una fotografia ke siempre me toka el korason: una novia kaminado al lado de su padre.
Kada vez ke la veyo, me akodro de una fraza ke dizen muncho:
«Las mujeres no pueden ser siempre reinas, ma para sus padres siempre kedan prinsesas.»
Despues viene otra refleksion.
Los spesialistos mos dizen: «No edukesh a vuestras ijas para ser prinsesas o reinas. Edukesh para ke sean personas ke puedan sostenersen sovre sus proprios pies.»
En los diyas de oy, dingunos pueden niegar la importansia de la eduksyon de las ijikas.
Un día, las ijas abandonan el nido para fondar sus proprias kazas. En el rostro de la novia se mesklan la alegria, el orgulyo i la insertitud. Mientras todos estos sentimientos enkuadran su alma, el padre va repitiendo en silensio todas las orasiones ke save para la ija ke tiene el trono mas alto de su korason.
Aze unos diyas vide una fotografiya de una novia kon su padre. Al prinsipio me paresio una imaj komo otras. Ma el titolo me emosyono.
«El ombre ke kamina al lado de la novia no es su padre… ma yeva el korasón de su padre.»
La istoria era esta.
Despues de pedrer a su padre en un aksidente de trafiko, la famiya tomo una desizyon muy difisil i muy jeneroza: donar sus organos. El korason del padre fue transplantado a un ombre ke durante muncho tiempo asperava un donador.
Kuando la novia supo esto, tomo una desizion muy espesial.
Keriya entrar al kazamiento al lado del ombre ke bivía kon el korason de su padre.
Los medikos le transmitieron este dezeo al resipiente del korsan. En akel momento, el ombre no pudo detener sus lagrimas.
No savemos muncho mas de esta istoria. Ma no es difisil imajinar la sonrriza del padre, refletada en el rostro del ombre ke oy bive kon su korason.
En realidad, lo ke me influenso a eskrivir estas línyas no fue solo esta istoria, si no la importansia de la donasyon de organos.
Es un tema ke todo la vida provoko munchas diskusyones. Ay ken no pensan por razones relijiozas. Porke no es una koza permitida. Otros, al kontrario, la ven komo una de las maneras mas elevadas de salvar una vida i de deshar una parte de uno mizmo bivyendo en otro ser umano.
Toda persona mayor de diez i ocho anyos, kon buen juzgamiyento, puede eskojer ser donador. Es una desizyon enteramente voluntaria.
Desgrasiadamente, esta kultura de donasyon no es tan entendida komo se deve. El komersyo illegal de organos i los abuzos ke de vez en kuando salen a luz aze peryer konfianza de la djente, i azen esta sistema mas difisil.
No se trata solamente de organos. Ser donador de selulas madre puede, de la mizma manera, salvar una vida.
Es un sujeto muy profundo. Doktores, psikologos eskrivieron livros enteros sovre este tema.
No me toka a mí entrar en este debate.
Solo kería detenerme un momento para invitar a kada uno de mozotros a pensar en la sensibilidad i la importansia de este sujeto.
A vezes, un batimyento de korason puede ser una maraviya.
