Una sosyedad ke no konose su pasado, no puede entender bien su prezente, ni preparar su futuro. La erensia kultural es todas las valores ke mos vienen del pasado i ke forman la identidad de una sosyedad. Los monumentos istorikos, las kazas antiguas, las tradisyones, las fiestas, las komidas, la muzika, los ofisyos tradisyonales, la lingua i asta las memorias ke mos kontan muestros aedados, todos azen parte de esta erensia.
La erensia kultural tiene una grande importansia porke mos akodra de ande vinimos. Una kaza antigua, una sinagoga, una meshkita, una iglesia o una kaye istorika no son solamente piedras i paredes. Kada una de eyas konta una istorya i mos da una idea de la vida, de las kostumbres i de los pensamientos de las personas ke bivieron antes de mozotros.
Ma la erensia kultural no es solamente los monumentos i los edifisios antiguos. Las palavras i biervos ke uzavan muestros padres i abuelos, las istorias de la famiya, las reseftas de komidas tradisyonales i las kostumbres de las fiestas son tambien valores ke devemos guadrar. Kuando una lingua o una tradisyon se olvida, es komo ke si un pedaso de muestra memoria se piedre.
Oy en diya, la teknolojiya i la vida moderna aserkan las sosyedades unas a las otras. Esto puede ser una grande rikeza, ma tambien puede azermos olvidar algunas de muestras tradisyones. Por esto es importante de avansar i modernizarmos sin piedrer el kontakto kon muestra erensia.
Guadrar la erensia kultural no kere dizir bivir en el pasado. Al kontrario kere dizir tomar las valores ke mos fueron dadas por muestros mayores i pasarlas a las jenerasyones ke vienen. Ensenyar a los mansevos muestras tradisyones, protejar los lugares istorikos, mantener las kostumbres i eskrivir las memorias, son maneras importantas de guadrar esta erensia.
Kada jenerasyon resive una erensia de los ke bivieron antes i tiene la responsabilidad de pasarla a los ke van a vinir despues. Guadrar lo ke mos fue dado es muy emportante para krear valores muevas para el futuro.
Porke la erensia kultural no es solamente la istoria de muestro pasado. Es la memoria ke mos dize ken semos, de ande vinimos i ke mos ayuda a formar el futuro. Una sosyedad ke guadra su pasado, puede kaminar kon mas konfiensia i konosimiento verso su futuro.
