Yeshaya Ben Amots era un Profeta en el Reynado de Yehuda en los anyos 700 antes la era Kristyana. En la mizma epoka, el Reynado de Asiriya estava en el mas alto grado de su poder. I el Reynado de Yehuda se aviya aflakado de su poder, i ansi las profesiyas de Yeshaya se peryeron. (Se realizaron en los anyos (1940 -1956). (En Los anyos (1947-1956) en unas grotas de Kumron, al lado de la Mar de Sal (Yam Hamelah) (Dead Sea) toparon las Megilotes del dezierto de Yehuda, kon sus manuskritos eskritos en Ebreo primitivo, ke mos da una version antigua del Tanah kon su eskriturya la mas vieja ke se deskuvrio asta oy. La Megila es de una largor de 7,17 metros, es la mas importante de todas las Megilotes deskuvridas de la Mar de Sal (La Mar Muerta). Es la Megila de Yeshaya ke en eya esta eskrito 66 Perakim. La Megila fue datada 165 anyos antes la era Kristiana, i es una de las mas presiozas de los trezoros del Muzeo de Yerushalayim, prezenta a los vijitadores los detalyos de su deskuvyerta, yamada (Nehama mim Amidbar). Kere dizir (Konsolasion ke viene del Dezierto.) Los vijitadores vyenen para ver i entender los sekretos i los detalyos de esta deskuvierta, entrando en la kaverna (Grota) de Kumron i oyen kon grande entereso en 10 puntos todo lo ke konserna esta Megila de 7,17 metros i su kamino verso el Muzeo de Yerushalayim.
Esta Megila es tan presioza ke demanda una guarda spesial kada punto i ora.
Arogaremos todos endjuntos ke la Megila Nahamu mos trayga una konsolasion verdadera, Pas i Amor en el Mundo entero.
