En vazyando un kashon, vide un album vyejo de fotos muy godro. Alimpyi el polvo ke aviya, i kuando avri la primera oja, sinti ke no toki solamente a las fotos ma, sinti tambyen ke me esto konektando kon los anyos pasados.
Esto rezulta ke el tyempo no solo esta avansando en los kalendaryos, a vezes esta asperando en silensyo entre las ojas de una oja de karton.
En los telefones tenemos miles de fotos. Kada dia estamos travando munchas fotos, estamos mirando unos kuantos segundos, i despues los estamos deshando ke se piedran entre las muevas.
Ma, en el pasado, una fotografia teniya una valor unika. Porke, kada album se konvertiya en el rekuerdo de una famiya. Este album teniya una kacha de ropa, los kantones estruidos, era uno de los objetos mas presyozos de la kaza. Porke aryento no aviya solo fotos ma, estos albumes guadravan las istoryas silensyozas de toda una vida. Oy estamos transportando miles de fotografias en muestra aldikera.
Las memoryas de los telefones se estan inchendo, muestros kuentos se estan ancheando, ma muestros rekuerdos ya no estan mas profondos komo deviyan de ser. Estamos travando las fotos, estamos embiyando a los keridos, i mos estamos olvidando a la fin.
Los albumes se avriyan en la famiya i se mirava las fotos durante minutos.
“Mira, tu granpapa kuando era mansevo”.
“Tu madre aviya kuzido este fostan”.
“Esta kaza ya se derroko, no esta mas”.
Kada foto mos aziya avlar, i akodrarmos de los nombres ke mos olvidimos. A vezes mos riiyamos, a vezes yoravamos.
Los albumes en realita son los archivos sin palavras de muestra istorya familiar.
Malorozamente oy, munchas de las fotografias se estan peryendo aryento de los ekranes.
El album tyene una golor spesyal. Ay anyos ke estan imprenyados en sus ojas. En tokando la foto, estamos tokando i el tyempo ke paso.
Oy, kuantos de mozotros estamos puedyendo dizir? “Mira esta es tu gramama, aki era muestra primera kaza, esto era muestra primera fyesta”.
Sino, todos muestros rekuerdos, estan en el ekran del telefono i se estan desparesyendo silansyozamente.
Puede ser, es el tyempo de azer un album, seleksyonando no unos kuantos syentos, sino las sinkuenta fotos mas sinyifikativas. Tomar notas chikas… Eskrivir la data… Meter los nombres… Porke despues 50 anyos, los inyetos ke van a mirar estas fotos, kereran ver no solo muestras karas, eyos tambyen kereran ver i saver muestras istoryas.
En realita, una persona no bive tanto tyempo komo bivio, sino tanto tyempo komo se akodra.
Una de las formas mas ermozas de akodrar es avrir avagar avagar un album vyejo de fotos i tornar las ojas.
Ken save… Puede ser un dia, una chika sonriza olvidada en el bodre de una foto deskolorida, trayera a muestros korasones, una boz ke mos eskarinyimos de oyir de munchos anyos pasados.
Akel tyempo vamos a entender ke, los albumes no guadran solo el pasado, tambyen konfian diskretamente el amor, el eskarinyo i los rekuerdos a las jenerasyones futuras.
Los rekuerdos azen umanos a una persona.
“Algunas fotos no mostran el pasado, mos azen akodrar ken semos reelmente”.
