Ay dos semanas ke esto eskrivyendo komo una seria, las maalles de Estanbol. Oy va terminar la seria. Ke no vos pareska ke las maalles son este karar. 3 semanas vos eskrivi sovre munchas maalles; me parese ke ya vos dio una idea de ande vienen los nombres de las maalles. Oy va empesar de Beyazıt.
El Sultan Beyazıt en este sentro dyo orden para ke fraguen un Külliye. Külliye kijo dizir en el doredor de un meshkita se topa, una eskola relijyoza islamika, biblioteka, ospital, kaza de komer, komo restorante, este modo diferente una fragua sosyal, kultural i relijyoza ke se topan lado kon lado. Por esto aki se yama Beyazıt.
El vizir de Sultan Fatih, ke se yamava Ishak Pasha, tomo la sivdad de la mano de los Bizantinos. Se yamava Arkhelais; los Turkos lo yamaron Aksaray. A las personas ke estavan bivyendo aki las mando a Estanbol i se enstalaron en este sentro. Por modo de los Aksaraylis ke vinyeron aki, se yamo Aksaray.
A Bakırköy Los Bizansos lo yamavan Makri Hori. Kuando lo tomaron los Otomanos aki empesaron a yamarlo Makri köy. En el anyo 1925, kuando se trokaron los nombres estranjeros, Ataturk kijo ke se yame Bakırkoy.
Los kavayos del Sultan se topavan aki. Aviya 7 puertas de ahires al bodre de la mar Marmara. Por esto este sentro se yamo Ahırkapı.
En el tiempo de los Otomanos a los esnafes aziyan kontrolar i estas personas se yamavan Emin, i la duana de los Emin era aki. Por esto se yama aki Eminönü.
El Sultan Fatih en kaminando en el sentro de Fatih le vino bozes por debasho la tierra. Le disho a los de allado, estash oyendo la agua esta ke koryendo i esta kitando boz "Hor Hor Hor"? Aze una fuente aki. I de akel dia este sentro se yamo Horhor.
Kuando viniyan las barkas i se aserkavan al bodre de la mar por la parte de Eminönü trayiyan sakos de arina, sevada, trigo, espesyas ets. Aki se topava pezos grandes para pezar. En Arabo pezo se yama Kabban. Por esto esta eskala se yama Unkapanı.
Taht-el-kale kijo dizir, debasho de la muraya. Abasho de la la muraya de Beyazıt por esto se yama Tahtakale.
El Hipodrom del tiempo de los Otomanos se fruaguo ande biviya el Sheyhulislam (El mas grande de los hodjas relijyozos),Veli Efendi. Por esto este sentro se nombra Veliefendi.
Antes las Chapas de las barkas se aziya en este kazal. Por esto aki se yamo Chengelkoy.
En el tiempo de los Frigyas, para eyos el arvole de Pino era Santo. De Chamlıdja fina Alemdag i Kayıshdag sembraron arvoles de Pino. En la lingua de los Arabos, Umran kijo dizir lugar adelantado; por esto se yamo aki Umraniye.
Por Uskudar kontan unas kuantas diferentes konsejas. Dizen, ke el sol kuando chafteya a este kazal, de Khalkedon ke es Kadıkoy se ve de enfrente komo Oro por esto se yamava aki Sivdad de Oro ets. Ama a mi me kuadro mas muncho la konseja ke vos va kontar agora. En Farsi postadji ke yeva letras o haberes a otros lugares se yamava Eskudari. En este sentro se topavan i biviyan estos Eskudaris. De akel tiyempo fin agora se troko i agora se yama Uskudar.
Keridos lektores vos puedo kontar mas nombres de los maalles. Dishe este karar ya abasta en tres semanas, kortare i pasare a otros sujetos. A la semana ke viene al vermos.
