En el pasado, la djente no se limitava de embiyar mesajes unos a los otros, embiyavan sus korasones. Oy tenemos los telefonos intelijentes. Estamos puedyendo avlar en unos kuantos segondos kon el otro lado del mundo, kon tokar una vez, estamos embiyando fotografias, estamos puedyendo avlar kon videos en vyendomos.
La teknolojiya mos garantizo una grande komodita. Malorozamente, estamos peryendo un poko de la profondita de muestras emosyones.
Eskrivir letra, no se tratava simplemente de meter el kalem sovre el papel. En primero pensavamos: “Kuala palavra devo de eskrivir?” o “Esta fraza le va plazer?”
Detras de kada linya, aviya tyempo, pasensya i esforso. La enklinasyon de la letra reveleria el estado de la alma de una persona.
Algunas linyas baylavan de alegriya, las otras mostravan las lagrimas. El viaje de una letra tambyen teniya su propya emosyon.
Kuando el ke trayiya las letras entrava a la kaleja, (el postadji), mos emosyonavamos. Kada anvelop ke viniya, no era solo un pedaso de papel, era una boz, una respirasyon ke viniya de muy leshos.
Agora, muestros mesajes estan ayegando en unos kuantos segondos. Ma, se estan olvidando rapidamente.
La letra ke se eskriviya antes munchos anyos, kuando sale de un kashon vyejo, mos esta espertando de un esfuenyo i mos estamos emosyonando.
Su papel amariyento, la tinta deskolorada i una golor, mos esta yevando en un punto a los anyos vyejos ke pasimos kon muncha felisidad.
Mi marido kerido (z.l.), ke este en gan-eden, si eskrivyo unas kuantas linyas por mi, oy si las meldo de muevo, syento komo si puederiya oyir su boz.
Porke las letras, guadran no solo las palavras, tambyen la alma umana del ke eskrivyo esta letra. Mizmo ke el ke eskrivyo esta letra no esta mas en la vida, su eskriturya kontinua a bivir.
Es por esto ke, las letras nunka se enviejesen reelmente.
Oy muestros ijos, i los inyetos se estan engrandesyendo aryento del mundo dijital.
Puede ser eyos, no desharon letras al kuti de posta.
Ma les puedemos azer una sorpreza chika. Les puedemos eskrivir unas kuantas linyas en sus dias de nasimyento por egzempyo: “Te kero muncho”, “Esto orgulyozo de ti”, u byen “Me alegro muncho de tenerte”.
Estas frazas, puedriyan ser los rekuerdos los mas presyozos ke se guadran anyos.
Puede ser, eskrivir letras no forma parte de la vida kotidyana. Ma, no mos olvidaremos de esta ermoza tradisyon.
Porke ay algunas emosyones ke se eskriven kon la punta de los dedos, ma no ayegan al korason.
Mientras, unas kuantas frazes senseras eskritas de mano, pueden rekonfortar el korason, mizmo munchos anyos despues.
Puede ser, es el momento perfekto para tornar a eskrivir letras. Porke, algunos rekuerdos no se meldan simplemente, se syenten de aryento el korason, i ay algunas palavras ke kedan immortalizadas solo en el papel.
Eskrivir de mano es un lenguaje de la alma ke mos diferensya los unos de los otros, amijorea el aprendisaje, ordena los pensamyentos i mantyene el meoyo aktivo.
Kon su disparisyon, las muevas jenerasyones, korren el risko de pedrer todos estos benefisyos.
