En una revista de eskola, meldi un artikolo ke topi enteresante. Aki lo esto traduizando abasho.
“Ayer en yevandola a mi ijika de syete anyos a la eskola, me demando una demanda. Me disho, “kual es el diya de la fiesta, el mas emportante del anyo?”
Instinktivamente respondi “Yom Kipur”. Despues me pensi i dishe “I puede ser ke es Purim”.
Un poko despues kuando me areti delantre de la luz kolorada en el trafik, me dishe “deve de ser Pesah ke es muy emportante en muestra istorya, hmmm i mas i mas sera Shavuot. Porke es el diya ke resivimos la Tora. AA puedeser Rosh Ashana.
Ma no me echesh kulpa por el desorden en mi mente. Si avrish un artikolo hasidiko sovre las fiestas del kalendario djudio, vash a ver ke el diya mas emportante del anyo es el diya ke estash meldando esto agora mizmo.
Los tekstos hasidikos sovre Pesah eksplikan ke la salida de Mitsrayim es el akontesimyento el mas emportante de muestra istorya. Akodrar i komemorar la salida de Mitsrayim durante Pesah, es fraguar la baza de muestra vida spiritual del avenir i de muestra relasyon kon el Dio.
Tanbien los artikolos sovre Shavuot dizen la mizma koza por la revelation en el Monte Sinai. Lo mizmo por Hanuka, Purim, Rosh Ashana i Sukot. Si, ya entenditesh… Todo esto es verdad siguro. En kada lugar del kalendario djudio se topa un orijen emportante. Estos son: Libertad, savidurya, alegriya, union i fidelidad. Estos son la baza de muestra vida espiritual i muestra relasyon kon el Dio. Sovre kada uno de estos kates, se fragua toda la konstruksyon. Kon todo esto Yom Kipur i Purim se apartan de todas las otras fiestas, komo son las mas emportantes. Sus diferensias son ke se fiestan en un solo diya, kon diferensya ke Rosh Ashana se fiesta dos diyas, Sukot ke dura siete diyas, Hanuka ke dura ocho diyas. Sus nombres tanbien son mizmos. Ansi es ke el grande kabalisto, el Rabino Yitzhak Luria afirma ke Yom Kipur tanbien puede yamarse Purim. Alora si Yom Kipur es lo mizmo de Purim, Purim deviya de estar ensima de la lista de los diyas mas emportantes.
Estos dos diyas sembolizan la ekstremidad. Yom Kipur en su dimensyon spiritual mos traye el taanit, vistir vistimyentas blankas komo los andjelos i pasar un diya entero kon repentimiento i orasyon. Purim se fiesta kon pransos, kompartiendo komida kon amigos i paras kon los proves i en vezes kon konsomar eksesivo alkol.
Estos dos diyas envitan a los judios a pasar mas aya de sus limites, i si lo azen kon fidelidad, de alma i de korason, buendad i alegriya sensera, se aserkan al Dio.”
