La semana pasada empesi a eskrivir los nombres de las maalles de Estambol. Deke se yaman kon este nombre? Oy kero kontinuar al sujeto.
El kazal de Fatih tomo el nombre del Sultan ke konkisto Estanbol de los Bizantinos, Fatih Sultan Mehmet. En 1453 diyo orden para ke fruaguen una Meshkita i al dorredor un Külliye. Despues ke se fraguo la Meshkita empeso a inchirse la maalle kon los Muzulmanos. I se empeso este lugar a yamarse Fatih. Fatih en Arabo kijo dizir Konkistador.
Beyoğlu viene del tiyempo del Prens de Pontus. El ijo de Rey de Venezia despues ke se izo muzulman empeso a morar i bivir en este maalle. Por esto se yamo aki El ijo del senyor, Bey oğlu.
Galata kijo dizir en Grego Leche. Akeyos tiempos aviya aki los ke vendiyan leche, por esto se yamo Galata. Ay otrun rumor. En Italyano Galata kijo dizir kamino ke abasha a la mar. Por esto se dize Galata.
Taksim, en el tiempo de los Otomanos las aguas se aziya espartir aki. Por esto espartir, distibuir kijo dizir en Turko Taksim.
Por Beshiktash kontan ke en el tiempo del Marinero Barbaros Hayrettin Pasha, para atar las Barkas metyeron en piyes sinko piyedras; por esto se yama aki kon este nombre. El otro rumor es ke un Papaz trusho de Yerushalayim una piyedra ke se yama Beshik Tashı, por esto dizen ke viene el nombre de este rumor.
Por Teshvikiye kontan ke el Sultan Abdulmecit kijo ke se frague un sentro aki. Por esto al puevlo los enkorojaron. Este estado es eskrito en las piedras ke se topan en la koshe del Karakol de aki tambiyen en la koshe de las kayes Rumeli i Valikonağı.
Bebek dizen ke viyene del Tiempo del Sultan Mehmet (Fatih). Akel distrito para korejar lo mando al zabit ke teniya lakap Bebek. El sigundo rumor, el ijo del sultan en kaminando en las guertas de aki vido una kulevra i se espanto. Por esto el padre le disho Bebe. I se yama este sentro Bebek.
Kadıköy es muy viejo. Dizen ke se fundyo en 675 A.C. El nombre era Khalkedon. Kijo dizir Sivdad de Kovre. Despues ke se tomo por la parte de los Otomanos paso la administrasyon a los Turkos. El Sultan le diyo al Djuzgador ke se yamava akel tiempo Kadi regalo por el dover ke esta azyendo, i desde akel tiempo se yama Kadıköy.
Bostancı, del tiempo de los Otomanos las guertas i los bostanes del Sultan se topavan aki. Para protejar este distrito, en primero se fruaguo un Karakol, aki esperavan los zabites para estar de guardiya ke se yamavan Bostancı, por esto se nombra aki kon este nombre.
En enverano el puevlo viniya por la parte de Göztepe fina Bostancı para entrar a la mar. No aviya akeyos anyos ni kazas ni moradas. Era aki kampos i vinyas. Un diya un Bakkal avryo aki una botika. Ken vido esta botika disheron ke echo puede azer aki bovo, por esto lo yamaron a esta persona Şaşkınbakkal. Ansina kedo fin agora este nombre.
En el tiempo de los Otomanos aki aviya guertas, kampos i vinyas de uvaz ets. El empesijo de las guertas porke era aki se yamo Bağlarbaşı.
En el tiempo de los Bizantinos aviya un distrito ke se yamava Pantecion o Pantiki. Kijo dizir el entorno de la muraya konvertir. De akel tiempo fin agora el nombre se troko de Pantiki a Pendik.
