Kuando oyi por primera ves esta palavra, kon mi meoyo de kriyatura, me aviya demandado deke eskojeron 40 anyos, i no 50 o 60 anyos… Kuando pasaron los anyos entendi ke esta palavra, no transmete el kafe en si, deskrive la valor ke las personas se dan uno al otro.
En realita el kafe no tyene valor.
Tener hatir, sinyifika de pueder asentarte a la mizma meza kon la persona de enfrente.
Tener hatir, krea una amista ke nase en el entorno de una tasa de kafe, un respekto tan grande ke se keda en la memorya por muncho tyempo. Es una amista sensera ke komo un akto de buendad, no se olvida nunka.
En el pasado, la djente apartava un tyempo para bever un kafe kon un vizino, amigo u una paryentes. Los telefones no sonavan. No se oyiya mesajes.
Ma oy, la vida troko i todo esta muy diferente.
Los lugares ande se beve kafes pujaron, ma las konversasyones se aminguaron. Los kafes estan yenos.
Dos personas asentadas en una meza, estan mirando a dos ekranes diferentes sin avlar. El kafe ya esta kayente, ma la komunikasyon entre eyos esta yelada.
Lo ke tenemos menester oy, es avlar kon un aliado, esbafar i kontar muestros problemes.
La jenerasyon dijital mos akselero. Puedemos komunikarmos kon munchas personas al mizmo tyempo.
Estamos avlando kon uno en el otro lado del mundo en unos kuantos segundos. Ma no estamos vyendo la vizina ke mora djusto al lado de mozotros.
Tenemos munchos amigos ma muy pokos aliados.
Puede ser la soledad se esta engrandesyendo por esta kavza. Una tasa de kafe en realita es un akto de rezistensya chika ma poderozo kontra la soledad. Porke el kafe kijo dizir: “Yo esto aki, puedes kontarme tus problemes”, i puedemos topar la solusyon en avlando endjuntos.
Lo ke dize la psikolojiya es: “Una persona ke se syente akompanyada, se enfortalese”.
Lo ke no se puede olvidar una persona es: Una mano ke se da en un dia difisil, una boz ke dize: “Ven vamos a tomar un kafe, ya te va ayudar”.
Mozotros no semos kontra la teknolojiya. Los telefones, las komputadoras mos fasilitan la vida.
En medyo de una vida mas fasil, ay una koza ke esta mas difisil. EL KONTAKTO REEL.
Azer kontakto vizual, notar la kanserya del denfrente…
Agora mos demandaremos una kestyon.
Kuando fue la vez de alkavo ke tomimos un kafe kon un amigo, kon el telefono de boka abasho sovre la meza, simplemente para avlar?
Puede ser la repuesta kedo en un tyempo muy vyejo.
Alora empesaremos de muevo a bushkar un aliado, sonaremos su puerta.
Le diziremos: “Si tyenes tyempo beveremos un kafe”.
Ken save… Puede ser akel kafe no sera akodrado 40 anyos. Puede ser 50 anyos. Puede ser se kontara despues ke mos fuimos de esta vida.
“Porke algunos kafes se terminan en un findjan, i algunos pueden kedar en el korason de una persona durante anyos largos”.
“La vida es muy ermoza komo el rekuerdo de los kafes kompartidos”.
