Una de las puertas de Yerushalayim Haatika se yama “Puerta de Leones”. Esta puerta se topa djusto en frente de “Ar Azeitim” ke es “El Monte de los Olivos”. Ensima las dos partes de esta puerta se topan dos leones. Para kualo son estos leones?
El sultan turko Otomano Soliman, despues ke konkisto la sivdad de Yerushalayim, metyo taksas muy fuertes al puevlo, ma el puevlo no estava puedyendo pagar estas taksas. Sovre esto el sultan se kijo vengar de eyos i kijo kastigarlos.
Akeya noche el sultan se sonyo ke dos leones se echaron ensima de el. Kon muncho espanto se esperto, estava terorizado.
Kuando se aklaro el diya, se alevanto de su kama i yamo a todos los ke enterpretavan los esfuenyos. Les konto su esfuenyo i les disho ke lo aklararan, ke sinyifikavan estos leones ke vido en su esfuenyo. Entre estos enterpretes se topava un viejo i respektavle ombre. Este ombre le demando al Sultan lo ke estava pensando antes de ir a echarse. El sultan le respondyo ke en la kama antes de serrar los ojos estava pensando komo kastigar a estos judios de Yerushalayim, ke no estan pagando las taksas. El viejo respondyo: En el nombre de Dio, ke sepas ke Yerushalayim es una sivdad santa desde muncho tiempo. Agora, despues ke tuvites pensamientos malos kontra sus abitantes, el Dio te enbiyo a los leones para ke te devoren. Por esto deves de mostrar piadad a la sivdad santa, si no vos va vinir mal grande.
Sovre esto el sultan ke biviya en su reyno, se fue a la sivdad Yerushalayim i vido ke la sivdad esta en ruinas. Las paredes i las murayas destruidas i el puevlo estava sin defensa. Ansina fue ke el sultan desido de konstruir una mueva pared al entorno de Yerushalayim. Trusho esklavos i lavorantes kon paga i les ordeno de meter dos figuras de leones a las dos partes de la puerta. Disho ke estos leones van a protejar las jenerasyones del futuro.
Desde akel tiempo esta puerta se yama “La Puerta de los Leones”.
