En los programes de televizyon ay una moda agora, programes de viyajes i paseos, i programes de istorya. A mi me plaze ver estos programes. Me enteresan muncho. Me ambezo muevoa kozas. En Estanbol bivimos ma no konosemos la sivdad entera. No mos vamos por aki o por aya para konoser esta ermoza sivdad. Konosemos solo los distritos ande bivimos ande lavoramos o ande estudiamos. Este karar. Napoleon diziya si el mundo era un paiz, la kapital seria Estanbol. No es fasil kontar esta sivdad. Es muy grande. En el mundo ay munchos paizes de esta grandor. Si dizish la populasyon es mas yeno de munchos paizes. Me parese ke vos va eskrivir sovre este sujeto en unas kuantas semanas.
Si keresh empesare del nombre de Estanbol. En munchas linguas tiene diferentes nombres. En Grego se yama Vizantiyon, En Latino Bizantium, Antoninya, Alma Roma, Nova Roma. En Grego ke se avla en Estanbol se yama Konstantinopolis, İstinpolin, Megali Polis, Kali Polis. En las linguas Slavikas Chargrad, Konstantingrad. En la lingua de los Baltikes ande biviyan los Vikings se yamava Miklagord. En Ermenesko, Vizant, Stimbol, Esdambol, Eskomboli; en Arabo Bizantiya, el Mahsura, Kustantina, el-Uzma; en el tiempo de los Selchuklus se yamava Konstantiniyye, Mahrusa-i Konstantiniyye, Stambul; en la lingua Otomana se yamava Dersaadet, Deraliyye, Mahrusa-i Saltanat, İslambol, Darü's-saltanat-ı Aliyye, Asitane-i Aliyye, Darü'l-Hilafetü'l Aliye, Payitaht-ı Saltanat, Dergah-ı Mualla, Südde-i Saadet.
Estanbol komo otras sivdades no es kolay de kaminar i konoser. Por esto vos va kontar lo ke me ambezi del giya ke mos kamino unos kuantos diferentes diyas las maalles. El klup de “Gezginler Kulübü” aparejava tures para la Evropa o diferentes paizes i tambiyen Tur de Estanbol para konoser la sivdad. Ya keriya kontarvos uno por uno porke ay kozas muy enteresantes. Si keresh empesare de la maalle ande nasi i bivi fina 7 anyos: Balat. Despues kestudyi la eskola primera en Ferikoy, despues mos pasimos a Shisli, i despues ke me kazi mos fuimos a bivir en Caddebostan. I despues las otras maalles.
Balat es una rejyon muy istorika. El nombre de Balat viyene del Grego i kijo dizir palasyo. (Palation o Palatia) En el tiempo de los Bizantinos, serka de aki aviya un palasyo ke se yamava Blaherna. Kuando vinyeron los Djudyos de la Espanya los metyeron aki para ke se instalen. El nombre Palatia en pasando los anyos se izo Balat. Despues de los Djudyos vinyeron los Ermenis i los Gregos para morar aki.
Ferikoy viene del tiyempo del Sultan Abdulmecit i Abdulaziz. Akeyos anyos aviya una mujer ke se yamava Feri. El Sultan le dio regalo estos kampos al marido de Madam Feri. Kuando se muryo el marido, kedo el nombre i se empeso a yamar aki Ferikoy.
Shishli viyene del tiempo ke morava aki una famiya ke aziya Shishes. La kaza ke moravan se yamava Shischiler Konağı. Pasando los anyos este sentro empeso a yamarse Shishli.
En Caddebostan oy en diya se topa kafes, lokantas, i botikas modernas i luksuozas. En el siglo 18, de Bostancı fin a Goztepe era kampos ande aviya arvoles, bostanlıkes i tarlas. Los djinisaros kuando ke se fuiyan de la armada, se eskondiyan aki. Tambiyen los Eshkiyas, del espanto los yamavan a estos kulpantes Djadis. Por esto aki se yamava Djadibostani. Pasando los anyos se nombro Caddebostan. La semana ke viyene vos va kontar sovre otras maalles.
