Avri mi almaryo i topi ariyento munchos rujes de kolor a kolor. La verdad es ke ay kolores ke nunka uzi i topi oje de unyas de mizma kolor. Yo tengo siyempre unyas kurtas i no meto oje. I yo de mi para mi me demandi porke me topi kon esta lokura de merkadura. Una koza semejante egziste sovre la meza de lavoro de mi marido. El tambien merko un monton de kalemikos de todos las klasas. I en el banyo topi shavones de munchas golores.
El “sendrom de ruj” es un konsepto muy enteresante para la ekonomia i la psikolojia i tiene tambien una profondidad filozofika. En realidad no es una erida, ni una hazinura; es simplemente una manera de konsumir ke oy en día es muy diskutida.
Este término fue prezentado en el anyo 2001 por la kompanyía Estée Lauder durante un período de kriza ekonomika. Kuando la ekonomía va mal i la djente no puede merkar vistidos de lukso, ni kozas muy karas, se torna a luksos chikitikos. Esto les aze sintir un poko mijor.
En poko palavras, el sendrom de ruj es la forma mas chika i mas konsoladora del dezeo umano de “tener.” Kuando no puedemos alkansar kozas grandes, mos apegamos a un pedasiko de kolor para protejer muestra vida interior. Kuando las kondisyones de la vida se enduresen, muestra alma demanda algunas “mimaduras” chikitikas para no deskayer. En akel momento, este chiko lukso mos asegura
“Mira, dainda puedes azer unas kozas por ti mizmo. I ay kozas ke estan en tus manos.”
Esto es una trampa de la lokura del konsumo, por otra parte, es un mekanizmo de defensa psikolojika. El sistema lo save muy bien i mos ofre esta iluzion de alegria komo si fuera un remedyo. Por un momento mos sintimos bien, ma esto no es un remedyo de verdad. Lo mijor es de topar las nesesidades verdareras i empleyar muestras posibilidades sovre eyas. Meldar livros, ambesar un ofisyo o una abilidad, tomar parte en un proyekto sosyal… todo esto mos da una mueva konsiensya i una mueva mirada sovre la vida. Esto no kere dezir ke devemos neglijar muestra aparensya. El punto no es abandonar el kudyo del kuerpo, ma meterlo en el sentro de muestra vida. Por esto, de vez en kuando, no ay mal en merkar algunas “lokuras” chikitikas.
La ekonomía del konsumizmo mos prezenta kada día muevas tentasyones. Espesialmente en el kampo de la teknolojia. Lo ke mos ofren no es fasil de rezistir. Lo ke tenemos en kaza mos abasta ma los reklames son los modeles “un poko mas adalentados”, “un poko mas briyantes.” Ensupito mos topamos kon kables de alargamiento, alates de sharj i munchas otras kozas. Ma, no puedemos evitar de mirar kon entusiazmo los reklames del último modelo.
En realidad, lo ke mas mos manka no es tener mas kozas, ni las mas muevas, ni las mas koloreadas. Lo ke de verdad mos manka es saver apresyar lo ke ya tenemos i tomar konsiensya de su valor.
