Ay unas kuantas semanas ke vos esto eskrivyendo kozas nostaljikas de los anyos de muestra chikes. En pensando kualo ke vos eskriva por esta semana de nostaljiya, me vino al tino el titolo ke vos eskrivi. Miri no kedo savor de nada de al tiempo. Por egzempyo antes los zarzavates i las frutas komiyamos en su sezon. Invyerno no aviya Berendjena, Tomat ni pipino, karpuz o serezas ets. Tambiyen enverano no se topava Karota, Ispinaka, Apyo, Mansana, Banana i Mandalina ets. Esperavamos ke venga la sezon. En primero saliya Turfanda. Ke savor ke era salyendo del invyerno komer la Zirguela, entrando al otonyo gostar la Mandalina era otra savor. Oy se puede topar kada modo de fruta i zerzavat kuando keresh. Kuando viniya primavera komo el mes de Mayo, se aparejavan para ir a la kampanya, a las adas o a Caddebostan. Kuando tomavan las frutas de enverano komo melon i karpuz tomavan 3 o 4 deyos de kada uno i lo guadravan debasho de las karyolas. No aviya puede ser muncha rikeza ma aviya abondansa. Invyerno me akodro, mi padre tomava 2 kilos de portokal, 2 kilos de mandalina 2 kilos de mansana. Oy estamos merkando del merkado 3 portokales, 4 mandalinas i 2 Mansanas. Los echos i las botikas eran mas muncho en Karaköy i Eminönü. Las noches en tornando kon el vapor a la ada aviya alegriya, se aziya sohbet, se beviya chay. En vezes pasava un ombre en la mano Whisky o pishkados ets i aziya lotariya; era un divertimyento muy ermozo. Komo pasava 2 oras no saviyamos. Enverano aviya sinemas avyertos. En entrando merkavamos misir o fruta seka komo pipitas i leblebis kon gazoz. Invyerno se tomava bilyetos kombines por los diyas de entre semana o por la noche de alhad, era una uzansa. Despues empeso la moda de ir a Bodrum, Marmaris, Kushadası. Los rikos se ivan a estos lugares. En kada sivdad aviya 2 o 3 oteles. Por egzempyo en Bodrum aviya Otel Halikarnas, i Otel TMT. En Marmaris tambiyen 2-3 oteles. No se ivan muncho por esto no aviya munchos oteles akeyos anyos. Los mas esnafes ke no eran rikos se ivan a Erdek, Avşa o Marmara adası porke aki no aviya oteles, aviya pansiyones i era mas barato.
Me akodro akeyos anyos las Sinagogas ke aviya en las adas o en Caddebostan. Kada Shabat o muedes komo Roshashana i Kipur se inchiya yeno para patladear. Tambiyen en los mezes de invyerno, kuando aziyamos el Pesah o Shavuot eran yenas las Sinagogas. Malorozamente oy puedemos dizir ke estan muy vaziyas. Despues de la Pandemia ke paso en el anyo 2020, peryimos munchas uzansas. Esto oyendo en munchas kazas no estan azyendo el seder del sigundo diya. La noche de Roshashana se estan arekojendo en munchas kazas para komer komo una komida normal. Kuando mos ivamos a la Mahazike Tora no topavamos lugar para asentar, este karar de yeno de ijikos i ijikas estava. No tengo muncho lugar para eskrivirvos las nostaljiyas ke me esta vinyendo al tino. Vos akodrash los Troleybuses ke aviya, en los otobuses aviya vendedor de bilyetos.
Antes, aziyamos amigavles kon los vizinos; eramos komo famiyas. Agora kuando estamos suvyendo endjuntos al asansor no te estan dando ni un saludo!
