Yaakov Agam 1928-2026
Yaacov Agam serro los ojos, en los diyas pasados, en 21 Junyo 2026. Mos desho su erensya artistika, en el torno del mundo entero. Su nombre fue syempre famozo, de ke empeso a lavorar en el arte. Fue uno de los pioneros del arte optiko i kinetiko, i su nombre se izo sinonimo kon este arte.
Su famiya era de Rusia Polonez imigrantes en Israel, su padre era un haham i kabalisto. I el kresio debasho de esta kultura onde la tradisyon djudiya okupava un lugar sentral.
Yo kuando me fui a konoser a Israel, en los 1985 vide, la fuente de lumbre i agua en el sentro de Dizengoff i me impresyono. En akeyos anyos, Dizengoff era el mas famozo sentro de Tel Aviv kon su shopping mall, kon sus kafes, i en la plasa este arte optiko i kinetiko. Ke kijo dizir optiko i kinetiko? La semana pasada meldi en el artikolo de Tilda Levi sovre Agam, dize ke komo La Torah mos defende de azer idoles, Agam bushko una forma de arte no komo idolo ma ke seya estetika i mekanika. La fuente, se konbino kon agua, luz, kolor i muzika, se moviya kontinualmente i ofresiya kada vez una eksperyensya diferente. De noche, la djente se arrekojian kon admirasyon en el torno.
En 2016, durante la renovasyon de la plasa, la fuente fue desmontada. Despues ke paso tiempo, se instalo debasho del nivel de la kaye, ma sin el aprovo de Agam. Nunka mas pudo funksyonar komo en sus primeros diyas. Me parese ke Dizengoff tambien peryo, kon los anyos, una parte de su elegansya i de su esplendor.
98 anyos, es una vida larga. Ma kuando una persona desha su marka en tantos lugares del mundo, ya no se trata solamente de su vida larga, esto es immortalidad. Munchas de sus ovras, adornan plazas publikas i figuran en las koleksyones de los muzeos mas importantes del mundo.
El dokumentaristo Ameríkano Warren Forma le dediko dos filmos: *Possibilities of Agam* (1967) i *Agam and...* (1980).
Saviyash ke en 1996 Agam resivyo la Medalya Jan Amos Comenius de la UNESCO por el "Metodo Agam", ke dezvelopo para la edukasyon vizuala para las kreaturas chikas?
Saviyash ke la enorma Hanukiya ke se alumbra kada anyo en la 5. Avenida de Nueva York, i ke entro en el Guinness World Records komo la mas grande del mundo, fue disenyada por Agam?
Saviyash ke en Mayo de 2014 una de sus ovras, *Emuna i Tefila Vizuala*, fue prezentada al Papa Fransisko por el direktor del El Al, i ke esta ovra reune simbolos importantes del djudaizmo i del kristyanizmo?
Saviyash ke, kuando tenia 81 anyos, kreyo en Taiwan un monumento yamado *Komunikasyon Pasifika kon el Mundo* para los World Games?
Saviyash ke en una vendida al mas alto pagador de Sotheby's en Nueva York, en Noviembre de 2009, kuando su ovra *Counterpoint with Four Themes* se vendyo por 326.500 Dolares, Agam disho: «Esto no me surprendio... Los presyos de mis ovras van a suvir mas i mas de akodro kon la istorya ke se kreado en el mundo del arte.»
En 2018 se avriyo en Rishon LeZion el Muzeo de Arte Yaakov Agam (YAMA). El deklaro al Jerusalem Post ke era «el uniko muzeo del mundo dedikado enteramente al arte en movimiento». Despues de bivir largos anyos en Paris se fue onorado kon una seremoniya en este muzeo i fue enterrado en el simenterio de Rehovot, en Israel.
