Las eskrituryas nostaljikas ke vos esto eskrivyendo i a mi me esta vinyendo bueno. Porke vozotros en meldando, yo en eskrivyendo esto azyendo nostaljiya i me esto indo a los anyos kuando era chiko o mansevo. En pasadas me fui al klup GKD; aviya ijikos i ijikas de 6 anyos fin 12 anyos ke vinyeron kon las madres o kon los padres i estavan djugando i se estavan engleneyando. Miri por aki por aya mas de los MADRİHes no aviya mansevos de 15 o 18 anyos. Kreyevos me emosyoni. Akel punto me vino a los ojos los diyas ke pasimos en el klup de Dostluk Yurdu. Kada Shabat i Alhad mos ivamos de la demanyana. Emprimero de las 10 fin las 12.30 aziyamos Folklor. Mos ambezavamos muevos bayles. Mos aparejavamos por la fin de sezon kuando aziyamos aktividades para los musafires. Aryento del anyo se aziya Balo en los oteles tambiyen i aya saliyamos a la shena para baylar Folklor o Modern Dans. En dizyendo Modern Dans i por esto aviya grupos en el klub. Despues del folklor empesava este lavoro. Fina las tres. Despues a las 4 empesava el parti de Disko. Baylavamos, kantavamos i flortavamos. El parti se eskapava a las 7; mos ivamos a deshar a las ijikas a las kazas, despues tornavamos al klub, de muevo mos asentavamos fina las 11 o 12. Mos eglenayavamos una maraviya. No vos pareska ke pasavamos el tiempo en vaziyo. Si aziamos vazyeduras, ma de estas vazyeduras salyo el skech FİKSO, el Teatro KULA. Mozotros kuando teniyamos 16-17 anyos, los grandes ke se ivan a la universitad o ke lavoravan teniyan 22-25 anyos. Aziyan teatros grandes mas muncho sovre los Djudyos. Mozotros kuando mos asentavamos 10-15 amigos despues de las 8, empesavamos a burlarmos de lo ke pasava en las kazas. I de esto salyo el skech FİKSO. Ken komo avlava, ken komo komiya, ken en djugando kartikas komo se inyervava ets. Mas despues ansina empesimos a imitar las avlas de los grandes ke avlavan en kaza en Ladino. I ansina salyo el Teatro Kula. Tambien el grupo Los Pasharos Sefaradis. Despues empeso la seria de Moiz. El puevlo se estavan pishando de riyir en los Teatros de Moiz. Kada anyo ennaltesimos la kalidad. En primero lavoravamos en el klub, despues los showes estavamos azyendo en los Teatros de afuera, komo Kenterler o MKM i AKM. Ke muzikales ke metimos en shena; Los suenyos de Yosef i otros, komo Les Miserables, Cats, Phantom of the Opera, Cabaret, Masada, ets.
Mas de esto teniyamos grupo de orkestra. Se aparejavan por los Muzikales o por los Teatros. Si empeso a kontarvos no mos abasta el tiempo. De akeyos anyos ke eran mansevos, kuando se izyeron grandes, munchos amigos se izyeron profesyonales kon el arte ke empesaron i se ambezaron en el Dostluk Yurdu. Ke diyas i noches ke pasimos aya. Por egzempyo antes del prinsipyo del anyo, mos kedavamos en el klub para dekorar el salon por el parti del Prinsipyo de anyo. Aparejavamos kutis de Pesah para los menesterozos. Matsa, Arina de matsa, Guevos, asukar, kolonya, charukas ets. Me esto akodrando oy en diya los amigos ke tenemos es del tyempo de la manseves ke estavamos en los klubes djudyos. Konosko munchos amigos ke son kazados del tiempo ke se konosyeron i flortaron en Dostluk Yurdu. Kreyo ke ay amigos ke estavan en otros Klubes el mizmo tiempo. Agora de ver el hal de los klubes ande no ay munchos mansevos i mansevas, la persona se esta emosyonando.
