Antes 40 anyos, kuando engrandesimos a los ijos oyiyamos bozes alegres en la kaye, las ijikas saltavan la kuedra, los ijikos djugavan kon las bilyas, todos estavan en la kaye ande moravamos.
Los ijos de oy se estan engrandesyendo en un mundo kompletamente diferente.
Los I pades, los telefonos intelijentes, los djugos dijitales, el internet se konvertyo en una parte natural de sus vidas kotidyana. Este trokamyento no es solamente por los paryentes, madres i padres, es tambyen una mueva eksperiensya por los granpapas i las gramamas.
Kuando eramos chikos, para alkansar a las enformasyones, bushkavamos en las ojas de los ansiklopedis, i lo ke eramos kuryozos de ambezar demandavamos a muestros profesores en la eskola.
Los chikos de oy estan ayegando a las informasyones del otro lado del mundo en unos kuantos segondos.
En esta situasyon, evaluar la enformasyon i distingir la verdad de la falsedad, es kada vez mas emportante.
Kuando estamos vyendo el mundo de muestros inyetos, estamos vyendo una jenerasyon ke se esta engrandesyendo kon la teknolojiya.
Munchos chikos sin ambezarsen dainda a meldar i eskrivir, estan uzando los ekranes kon sus manikas chikas.
Grasyas a los dispositivos dijitales, pueden alkansar a un kontenido edukativo, ambezarsen linguas estranjeras i konoser diferentes kulturas de todo el mundo.
Ma, esta teknolojiya tambyen tyene sus inkonvenientes. Porke, estar oras largas delantre de un ekran, puede redusir la aktivita fizika de los chikos.
Los amigos de korason, los aliados, los djugos ke se djugan en el ayre libre afuera, las konversasyones entre famiya tyenen un rolo muy emportante i muy grande. En este punto ay un dover grande ke los grandes deven de azer. Mozotros puedemos konstruir un ponte entre el pasado i el futuro. Puedemos kontar a los inyetos los djugos ke djugavamos kuando eramos chikos. Puedemos meldar livros endjuntos, puedemos mirar las fotografias de muestra manseves.
Una gramama ke konta una istorya a su inyeto, dingun ekran no puede pasar al lugar de esto ke es muy valutozo. El amor, i el partajar no tyenen una alternativa dijital. Lo ke es emportante es de tener el ekilibro. Mizmo ke se okupan de la teknolojiya deven de konoser la naturaleza, azersen amigos kon los livros, pasar tyempo kon sus grandes i deskuvrir la rikeza de la vida real.
Oy en dia, munchas gramamas, grasyas a las video-yamadas, pueden komunikarsen kon sus inyetos ke estan a kilometros de distansya.
Las selebrasyones de fyestas, los dias de nasimyento, konversasyones de kada dia, esta kontinuando en los ekranes.
Kale ser kapache de rekonoser la kuriozita, las emosyones i las nesesidades de los chikos. Los inyetos de oy van a ser los adultos de amanyana.
La erensya la mas valutoza ke puedemos desharles, no es un telefono ultimo model u una koneksyon rapida de internet. Sintirse kerido, ke lo keren byen, ser oyido, kompartir i eksperimentar las relasyones familyales es lo mas emportante.
La teknolojiya puede trokarse, ma las relasyones ke se konstruyeron kon amor entre mozotros son inolvidavles.
Lo prinsipal es de evitar ke la luz de los ekranes supere la temperatura korporal umana.
Lo ke los chikos nesesitan es la atansyon, el amor i el tyempo de kalita ke pasamos endjuntos.
