La semana pasada vos konti la aventura de muestro internet. Esta semana vos va kontar lo ke aziyamos kuando no aviya internet en mi chikez.
Desparte ke no aviya internet, no aviya ni televizyon, ni telefones selulares, ni telefones en las kazas, i en munchas kazas no aviya ni radyos. Mozotros en muestra kaza teniyamos dos radyos. Uno de mi nono i otro de mi papa. La radyo de mi nono era una radyo grande kon lampas, ampules aryento. Kaliya asperar ke los ampules se kayenten i despues se bushkava el posto ke keriyamos. Lo mas muncho mis paryentes bushkavan “la Radio Montecarlo” ma ya me akodro ke no se oyiya muy bien. Kon muncho parazit. Djusto ke ya toparon un posto, ya se fuyiya del lugar, ya se kortava. A la fin mi papa merko una otra radyo. Estava i muncho mas chika i mas moderna. No kaliya asperar para ke se kayente. Teniya i botones, kada boton teniya una onda. Onda kurta, onda media i onda larga. Aviya munchas mas estasyones.
Estas radios teniyan de menester de antenes. Estas antenes eran teles de kovre. Mas larga era el anten, mas mijor se oyiya la radyo. Ke aziyan? Mi papa aviya trayido un top de tel de kovre. Este top de kovre se echava al tejado muestro. De aya se echava al tejado del apartamento d’allado, de aya al tejado de enfrente. Una punta se entrava a la radio i la otra punta se kedava en los tejados, asta ande se termino.
En la eskola mos diziyan ke en las Amerikas aviyan radios ande se viya fotos i filmos. No mos kreyiyamos ke puediya aver televizyones. Kuando vino la televizyon a Estambol, yo ya era grande. Doz o tres tadres a la semana, asperavamos kon grande emosyon. Eskapavamos todos los echos para no alevantarmos de delantre de la televizyon. Aviya tanbien musafires ke viniyan a ver. A estos musafires los yamavan “Telesafir”. Se koziya los chayes, se ofresiya borekitas, fruta seka i mas. Despues de tiempo, los diyas de programes se munchiguaron. I mas despues las televizyones se izieron kon kolor.
En kada kaza no aviya telefon. Kaliya eskrivirse a la sira. O merkar kon muncha para. Mozotros kuando mos kazimos mos eskrivimos a la sira de tomar telefon i asperimos 10 anyos. Si, 10 anyos asperimos ke mos venga la sira. Ya mos vino la sira, ya mos enstalaron el telefon ma kaliya asperar oras para pueder telefonar, porke no aviya el sonido ke puediyamos formar el numero.
En supito muestro kosuegro disho ke su ermana ke bive en Toronto, Kanada, estava avlando kon un telefon selular, ke akel momento eya se topava en el supermarket. Komo puede ser? Mos riyimos, mos enkantimos. Akel tiempo los selulares eran grandes. Agora ya se enchikesyeron i tienen munchos marafetes. Biveremos i veremos mas otros muevos inventos mirakulozos.
