Keridos lektores, ya savesh ke so ennamorada de la muzika Turka i ay anyos ke me vo a los kursos. Una kultura muy onda, en kada lisyon mos ambezamos muevas kozas, seya los makames ke ay kaji 500 makames, seya las palavras, seya los ritmos, un pozo sin fondo.
El 11 junyo, diya de djugeves, realizimos el ultimo konserto de este anyo en el oditoryum de İŞ SANAT. Kada anyo realizamos dos konsertos, el uno es konserto de invyerno i el dalkavo, konserto de primavera. Kada konserto tyene su tema, por egzempyo “en memorya de un kompozitor” u byen “kantikas para syempre”; el tema de este konserto era “ESTANBOL”.
No saviyamos ke egzistiya tantas kantikas sovre Estanbol.
Martılar ah eder, çırparlar kanat
Deryalar açılır, kat kat...
Gayri beklemeye kalmadı takat
Görünsün karşıdan Istanbul şehri...
Dalgalar yar beller, kopar kıyamet!
Deryayı kan eder, kan eder hasret
Gayri beklemeye kalmadı takat,
Görünsün karşıdan Istanbul şehri
Las gaviotas suspiran, kon sus alas
La mar se avre, kon las olas,
Ya no kedo fuersa para asperar
En mi esfuenyo aparese Estanbol de leshos
Las olas mostra el amor
El eskarinyo mostra la mar sangre
Ya no kedo fuersa para asperar
En mi esfuenyo aparese Estanbol de leshos.
Estas palavras las eskrivyo el grande poeta Nazım Hikmet Ran, kuando estava en prezo ke teniya un eskarinyo por Estanbol. Despues la muzika fue kompozada por el maestro de muzika, Mesud Cemil.
Kon esta kantika empeso la sigunda partida del konserto i despues akonpanyo los solos i el koro kantikas kon los ermozos sentros, kon el Bosfor i kon las izlas de Estanbol.
50 koristos, de las dos de midi fin las sesh de la tadre izimos provas kon el ekipo de saz i djusto a las ocho de la tadre salimos a la shena kon una disiplina inkreivle.
Solo kon kinze puntos de deskanso kaji 3 oras estuvimos en pyes i sin menear kantando. Malgrado ke teniamos los kalsados muy konfortavles yene mos kansimos ma syempre lo digo: las palmas i el entuzyazmo del puevlo mos izo olvidar toda la kanserya. Un grande remersimyento a muesto sempatiko shef, artisto i kantador de la TRT, İBRAHİM SUAT ERBAY ke mos ambezo tantas kantikas byen difisiles kon grande pasensya i un remersimyento al ekipo de saz i eyos tambyen de la TRT. Abrasos a mis amigas de klasa, mos espartimos en fyestando este konserto inolvidavle i mos dimos palavra de vermos en la mueva sezon en el mez de Septembre.
