Kuando mi madre me yevava a merkar vistimyenta mueva, i una bluza ke me plazyó estava un poko ancha, la vendedora diziya: “No ay nada, se va estrechar en el lavado”. I si la bluza estava un poko estrecha: “No ay nada, se va anchear en vistyéndola”... No se kere dizir ke esta elastisidad tan util de las vistimyentas de al tyempo no se nombrava kuando la bluza me viniya djusto. De vez en kuando, para avansar unos kuantos groshes, ívamos a una “botika de fabriká”. Malorozamente seya lo ke seya la fabriká, nunka fabrikava las markas dezeadas por los mansevos de akeyos tyempos (por egzemplo Wrangler por bludjín o Speedo por mayó), sinó era una de las munchas fabrikás de tekstil ke aviyan en Israel en los anyos 70. Para markas enternasyonalas famozas kaliya asperar los viajes a Estambol. Aínda me akodro el par de kalsados de spor Puma ke me merkaron ayá, i se izo el objekto de selo de todos los ijikos de mi klasa en el primer diya de eskola dospués de las vakansas de enverano.
Jeneralmente se preferava azer los empleyos ande los toptandjís (grosistos). Los menesteres para la eskola no se merkavan en la papeleriya kara al lado de kaza, sinó en una botika yena-yena ke no se puediya meter ni una alfinete. Ayá se vendiya una seleksyón grande de artíkolos, de eskovas i farashanás asta tefteres i kreyones. Fruta i zarzavat se merkava solo en el charshí (merkado) ande los produktos estavan mas freskos i eran mas baratos, i nunka en el supermárket (o seya súpermarket...). Ni menos kezos, pasturmás, azetunas, trushís i fustukes se merkavan en el supermárket, sinó ande Izak, el bakkal turkano, ke teniya su botika afuera del charshí.
Las vistimyentas eran karas, i nunka se echavan al chop. Las manchadas o deskoloradas (entrekesidas) se aziyan handrajos i las ke se izyeron demaziya chikos o demodé se davan a otros. La mosa eskojiya lo ke keriya, i el kusur se dava a la WIZO, organizasyón de byenfezensya de mujeres en ke mi madre era myembra. Oy la djente inche sus garderobes kon vistimyenta barata de la China. Tan barata es ke ay ken se viste kada koza una vez o dos, i dospués la echa al chop para evitar de lavarla...
