Keridos Lektores,
El faktor mas emportante en la kapachita del puevlo djudyo para prezervar su egzistensya en su naturaleza autodinamika, es uno de los prinsipios mas emportantes ke la struktura establesida para asegurar su kontinuidad.
La oto konfienza, la kapachita de aprovechar al maksimo la propya enerjiya i spesyalmente komo superar los obstaklos ke se prezentan en el kamino, son abilidades ke seyan aprendidos a lo largo de los siglos.
Unos kuantos egzempios de dichas sovre este sujeto.
La ormiga es el simbolo del esforso, de dilijensya. Es un konsejo para los paresozos.
Kale mostrar el primer esforso, para ke el den frente mos ayude.
Dingun lavoro no te arebasha, ma al kontraryo te alevante.
El Dyo da al ke lavora i kere avansar i reushir. Si mostras tu esforso, el Dyo te va ayudar.
El ke lavora reushe.
No peryas tu rango, ke te tomen el lugar. Kale ajisar a tyempo, i saver komo no desaprovechar las oportunidades.
Las aksyones son una fason de amor. Atarse a una persona es mostrar su komportimyento.
Sin lavorar no se ayega a nada. Los djudyos se dispersaron a los kuatro kantones del mundo.
El apoyo uniko es la unidad entre eyos. Para pueder asegurar este apoyo uniko, devemos de amostrar la solidaridad kon todos, sin diskriminasyon.
Los otros no deven de ser estranjeros para mozotros. Al kontraryo kale akseptar al den frente komo es, kon su karakter. Devemos kontinuar muestras tradisyones para transmeterlos a muestros ijos.
Un vizino bueno es mas muncho de un ermano.
Buen vizindado, es mas adelantre de la ermandad.
Los ke tyenen entre eyos una amistad, una kerensya pueden kaver en un lugar chiko.
El sufrir es manko kuando tyenes una persona kerida al lado de ti, i puedes partajar tu problem.
La persona no se muere de no tener, se muere de estar solo i no pueder avlar.
Lo ke puedes azer tu kon tu mano, no deshes ke los otros lo agan.
Si tyenes el poder de azed buendades al entorno no te detengas i azelo.
Kon una mano no se puede azer nada. Kon munchas manos, kon la unidad se puede realizar munchas kozas.
Deshar todo i murir kon ojos avyertos es murir kon regreto.
Mos vamos a kudyar a un hazino kon muestro korason, porke keremos verlo, estamos en kudyados, kon muestra egzistensya i si ay menester de una ayuda kon paras mos enkargamos i azemos lo ke es menester.
