En 1936, Sylvan Goldman estava en su ofisina de Oklahoma City, mirando una siya de tavla ke se avre i se serra. Era un ombre de profunda konfiensa, tenasidad i grande vision. Su erensya djudia le aviya enkulkado la valor del tikkun olam: la idea de reparar i amejorar el mundo. Empleyo esta leson en su lavoro. Era proprietaryo de los magazenes de komer Humpty Dumpty, se apersivyo de un grande problem: sus klientes aretavan de merkar kuando sus sestos de kompra se aziyan bastante pezgados.
Sylvan konosiya el lavoro i la importansya de empesar de zero. Su famiya aviya fraguado una vida buena empesando de nada. Kreiya ke Dyo ayudava a las personas para solusyonar problemes difisiles. Una noche, miro la siya ke se avre i serra i tuvo una idea briyante… Si metiya karuchas a los pyezes i un sesto enriva, la djente podria yevar sus kompras mas fasilmente. Yamo a su amigo mekaniko Fred Young. Djuntos konstruyeron la primera karosa de kompra (shopping cart).
Sylvan estava entuziazmado. Lavoro i peno para perfeksiyonar su muevo invento. Keriya ke estuvyera pronto para el uzo publiko. Eskojo un dia spesyal para prezentar su kreasyon al mundo. El 4 de Junyo de 1937, prezento ofisyalmente su invento a sus klientes.
Ma kuando arivo el grande dia, dingunos no los empleyo. Sylvan kedo mirando a sus klientes kon tristeza. Los ombres se sintiyan komo inkapachis kon la karrosa, estavan preferando kaminar kon sus sestos. Las mujeres pensavan ke la karrosa paresiya a los de bebes, no kerian sirkular kon una karrosa de bebe falsa! Este dia de Junio, las karrosas kedaron al lado de la puerta vaziyas i sin utilidad…
Munchos sovre esto podrian esvachearsen. Ma los raizes djudios de Sylvan le prokuraron una grande determinasyon. Se akodro komo sus antepasados aviyan konfrontado las difikultades kon indjenyo. Refuzo de deshar murir su suenyo. Desidyo uzar un astusyo stratejiko para ambezar a la djente la mueva forma de merkansia…
Yamo aktores, ombres i mujeres, para ke kaminen kon las karrosas aryento del magazen i inchirlos kon merkansias. Tambyen metyo un ombre muy amavle a la puerta del magazen. Este ombre dava una karrosa a los klientes en dizyendo “Mira, todo el mundo los estan uzando. No keres provar una?”
El truko kamino a la perfeksyon. Los klientes vyeron ke las karosas eran provechozas. Despues de este dia todos empesaron a emplear estas karrosas. El 4 de Junio fue un dia ke transformo los supermarketes para syempre. El invento de Sylvan fue una reushita grande. Fundyo un muevo echo de produksyon yamada “Folding Carrier Basket Company” para fabrikar karosas para todo modo de komersyo en todo el paiz.
Sylvan Goldman se izo un ombre muy riko, ma nunka se olvido sus valores. Kreiya ke la rikeza era un dono para espartir kon todos. Dyo milyones de dolares a organizasyones de bienfezensya djudias, ospitales lokales i grupos artístikos. Ayudo a konstruir un sentro komunitaryo i apoyo a las eskolas. Para Sylvan, la karosa de la kompra no era solo un medyo para ganar paras. Era una forma para fasilitar la vida. Uzo su reushita para ayudar a los ke nesesitavan. I ansi desho un legado de buendad ke perduro muncho mas despues ke sus karosas trokaron el mundo.
