En el anyo 1926, un diya, su marido vino a kaza i le disho ke estava ennamorado de otra mujer. Eya no supo kualo dizir. Su madre aviya murido unos kuantos mezes antes, kon este mal haber no tuvo tyempo de yorar a la muerte de su madre, agora no le kedo ni kazamyento.
Agatha teniya 36 anyos i en akeyos anyos en Inglatierra una mujer divorsada no era fasil de bivir. No la kontavan, no la invitavan i todos se adjideavan de eya.
Agatha Miller nasyo en el mez de septembre 1890 en Inglatierra en Torquay. A los kuatro anyos se ambezo a meldar, empeso a meldar livros, los livros eran un grande pasatyempo, eran una forma de vida para eya. A los 22 anyos, konosyo a Archi Christie, piloto de la Real Fuerza Aerea, en una kaza de una amiga, se ennamoraron i se kazaron, en los primeros diyas de la primera gerra mondial.
Kaji kuatro anyos bivyeron separados achakes de la gerra. En el primer anyo de kazamyento les nasyo una ija nombrada Rosalind.
Agatha aviya eskrito sesh livros polisyes no rekonosidos, peryo a su kerida madre i agora su marido ke lo kijo tanto byen keriya divorsar.
Poko tyempo dospues entro en una depresyon muy grave. Se esparesyo, dingunos no savian ande estava. Onze diyas dospues la polisiya de Inglatierra topo su otomobil serka del bodre de mar i la toparon en un otel mizerable.
Vino de muevo al mundo achakes de su ijika de syete anyos Rosalind. Se suanyo i empeso de muevo a eskrivir. Teniya menester de ganar paras ma eya en eskrivyendo topava pas.
En 1928 se embarko sola al treno Orient Express i kamino la Evropa entera. Los viajes para los eskritores es imajinasyon, ken diziya ke este viaje anyos dospues se iva azer un romanso famozo.
Un diya una amiga la envito a una ekskavasyon arkeolojika en el Oriente Medio. Esta envitasyon para Agatha era muy emportante porke en Inglatierra una mujer divorsada no teniya onor, de vista aksepto.
Era el anyo 1930, ayi konosyo a Max Mallowan, el, teniya 26 anyos i eya 40. Max era arkeologo, se ennamoro de el i de vista se kazaron. Este kazamyento duro 45 anyos asta la muerte de Agatha.
Agatha en su vida, publiko 66 livros polisyes, kon esto eskrivyo kuentos i ovras de teatros ke se djugan oy en dia. Sus livros vendyeron dos milyones de kopyas.
En 1968, Max fue nombrado kavalyero por sus kontribusyones de arkeolojiya. Tres anyos dospues en 1971 Agatha fue nombrada Dama Comendadora de la Orden del Imperio Británico.
Akea mujer kita de marido, akea mujer ke paso depresyon i kijo murirse se konvertyo en DAME AGATHA CHRISTIE.
Muryo el 12 Enero de 1976 en su kaza de Oxfordshire a los 85 anyos al lado de su kerido marido Max. Eskrivyo fin el diya de alkavo de su vida.
Nunka no se vido diferente de otros, desho una erensya de istorya a la umanidad.
Las malas oras de su vida no fue el final de su estorya, a la kontra fue el empesijo de su mueva vida.
