En un supito se oye un sonido fuerte: “chat”.
El sonido de una puerta ke se serra kon fuerza. Si la puerta se serra por el ayre, no ay muncho ke dizir. Este sonido ke viene kon el ayre de la natura mos aze solamente dizir: “De ande salyo este ayre en supito?”
Ma a vezes esta puerta se serra despues de una batalya de palavras entre una ijika i su madre… O despues de una deskonsolasion entre un mansevo i su kerida. Este sonido es tan fuerte ke puede azer mover las paredes.
Serrar una puerta kon fuerza no es solamente un movimiento. Es la reaksion de un sentimiento, de una impotensya, de una impasyensya. Es la reaksion de una desizyon tomada sin pensar, de una emosyon apresurada.
La persona ke serra la puerta aze munchas kozas al mizmo tiempo. Primero, amostra sus sentimientos. Despues, dize a la puerta lo ke no pudo dizir kon palavras. I, lo mas importante, se aze “vizible”.
No puede dizir:
“Ya no tengo pasensya.”
“Tengo muncho ke dizir ma no me keda fuersa.”
La puerta, ke estuvo tanto tiempo kayada i repozada, de repente se entuziasma i alevanta su boz. Ma si en lugar de serrar la puerta kon fuerza, eskojémos tokar, la vida puediya tener mas sentimientos. Tokar una puerta es una ekspresyon muy antigua, ma aún oy tiene una verdad profunda, malgrado la kultura moderna ke se va desmoronando. Las puertas no se avren solas. Le manka una demanda.
Le manka la intensyon de dar el primer paso. Kerer provar…
Estar presto para la repuesta…
Estas son las primeras kondisyones para tokar una puerta. Munchas vezes las puertas paresen serradas…
Asta ke alguno las toka.
Entonses pueden avrirsen de par en par. A vezes avrir la puerta va tomar tiempo.
I otras vezes esta puerta no se va avrir, para dar lugar a otra oportunidad. Ken save si, en lugar de una puerta serrada, no va apareser una ventana. Si una puerta no se avre, devemos pensar:
“Por bueno ke seya. “La puerta serrada mos susurra:
“Este kamino no era para ti. Te esto dirijiendo a un lugar mas apropriado.”
El proseso de akseptar esto puede ser difisil. Ma a la fin entendemos ke la vida no avla en vazio. Las oportunidades no se eskapan. Muevas oportunidades nasen. I una mueva oportunidad es luz. La vida, munchas vezes, manda sus salidas mas briyantes por las ventanas mas modestas. Ma vozotros, no serresh las puertas kon dureza.
No deshesh oír el sonido “chat”. I si es posible, deshá la puerta un poko avierta.
Esto no es debilidad.
Es una forma de elegansya.
Ken save…Si una vez un día esta puerta se remarka en kondisyones muy ermozas i keresh partajar vuestro sukseso, no vos olvidesh:
Detras de la puerta ke deshates, munchas vezes keda syempre una chika rezonensya.
