Aviya un ombre, dizeremos Jak. Jak teniya 60-65 anyos. Un diya estava asentado kon sus amigos, todos emeklis, bevyendo chay al bodre de la mar. Estavan avlando d’aki d’aya. De la politika, del aver, i siguro de lo ke se avla a esta edad: la salud. Uno de los amigos se kesho de los dizes, el otro se kesho de la tansyon i un otro se kesho de sus romatizmos. Le demandaron a Jak, "Jak tu no te estas keshando. No tienes nada?" Disho Jak: "No, no tengo nada, bendicho el Dio". "No te vas al Doktor?" "No, sin tener nada no me vo". "Aaaa!" disheron los amigos. "Vate, i a lo manko azete un kontrol, a esta edad kale kontrol".
Jak tomo este konsejo a konsiderasyon i se fue a un doktor enternisto. El doktor kijo una analiz de la sangre. Jak se izo la analiz. Le salyo un poko de kolesterol. El doktor le dyo una kura para el kolesterol. Ma la kura le toko al ligado, esta vez el v le dyo una kura para el ligado ke le toko a los bobrekes. Esta vez le dyo otruna kura para los bobrekes ke le toko al estomago. El povereto de Jak, ke no teniya nada ampeso a eskayer de diya en diya. A la fin kayo en kama. I se sintyo ke ya esta para murir. Les disho a sus ijos i a su mujer: Kuando me va murir eskrivi estos biervos ensima de mi tomba: YA ESTAVA BUENO, PARA ESTAR MIJOR, ESTO AKI.
Deke vos konti esta konsejika.
Desde el anyo 2000 ke empleyo el internet. La primera semana del mez de Mayo, me telefonaron de Türktelekom ke mos enstalaron Fiberoptik. Ke es muncho mas presto, ke no va ser mas karo i ya savesh, muncha avlastina. Dishimos peki. Vinieron, metyeron los kablos i ampeso el internet muevo. Maraviya! Despues de 4-5 diyas, no tengo internet. La luz vedre se izo kolorada. Pishin bushki la kompanyiya de internet. "Ya tomimos nota, en mas kurto tiempo vos vamos a reparar la linya".
Aspera ke asperaras. Un diya dos diyas. Entremientes entro i la fiesta de Kurban. Yo telefonando kada diya, i tomando la mizma repuesta. Les dishe ke me tornen atras, komo la linya de antes. No era posivle porke los kablos de kovre ya las aviyan kortado. Kurto vos azere, kaje un mez no tuve internet. Trokaron el kablo entero desde el empesijo. Porke este kablo no tiene tel aryento, tiene vidro. I este vidro no se puede adjustar. Kaliya trokar la linya entera.
Djusto komo la konseja ke vos konti ariva. Ya teniya internet bueno, para tener mijor, me kedi sin internet.
