Ay dos semans ke vos esto eskrivyendo “Las Kuzenderas de mi chikez” i “Las Eskolas de mi chikez”. En eskrivyendo i yo tambiyen esto azyendo nostaljia kon vozotros. Oy vos kero eskrivir sovre “Las plajes de mi chikez”. Me akodro kada enverano mos ivamos a Caddebostan. Era muy chiko. Teniya 5 o 6 anyos. Fin ke me kazi kada anyo despues ke se serravan las eskolas viniyamos a Caddebostan. Pasavamos el enverano entero aki. Solo un anyo no mos puedimos ir, porke akel anyo iva empesar a la primera klasa pasimos de Balat a Feriköy. Por esto diya de alhad mos ivamos a Florya todos endjuntos unos kuantos vizinos o amigos a la plaj ke se yamava Florya Gunesh Plajı. Demanyana muy demprano komo 8 saliyamos al kamino. Mos ivamos a Taksim tomavamos el otobüs de Florya kaji a las 10 viniyamos a la plaj. Mozotros los chikos en abashando del otobüs korriyamos al gishe para entrar a la sira. Los grandes viniyan mas apoko porke teniyan unas kuantas chantas en las manos. Vash a dizir kualo aviya de tomar este karar de chantas. Vos kontare. Porke mos ivamos munchos, las madres aparejavan kozikas de komer para midi i para despues de midi en la plaj. Djeneralmente kyoftikas fritas ke las metiyan en un kanton de pan. Sandviches de kezo blanko kon domat i pipinos. O si no sandviches de sharkuteri, komo salami o sudjuk. Desharemos este kavzo de un lado; kuando viniyan los grandes al lado de mozotros, tomavan bilyeto para entrar i kabinas para trokarmos. Mos vistiyamos los mayos i viniyamos al bodre de la mar; mos asentavamos ensima de la arena. Los ijikos kuando viniyan los grandes en koryendo mos echavamos a la mar. Diya entero estavamos aryento la mar. Djugando a bala o nadando ets. Kuando viniya las oras de komer mos yamavan i asentados ensima de la arena komiyamos kon grande gana. Akeya vez en asentando, los oyidos teniyamos en las palavras i konsejas de los grandes ke estavan kontando. Ke ermozo ke era. Las rizas se oyiya de un kilometro. Despues de komer no mos deshavan entrar pishin. Asperavamos kaji medya ora para ke mos espide la komida. Kuando mos davan permisyon para entrar a la mar, kon guste grande korriyamos defa a la mar. No mos artavamos de nadar i djugar. Mos yamavan los grandes ayde ya abasta vos vash a yelar, vos vash a azer hazinos. Ken oye a eyos. Mos burlavamos i mos fuiyamos al lado de eyos.
Viniya oras de despues de midi, kada uno kitava los tratamyentos ke aparejaron en kaza komo borekas, boyikos, biskochos, kekes. I al lado frutas komo uvas, serezas, sheftelis. Ke savrozo ke era komer todos endjuntos. Las oras kuando amostrava 5 empesavamos a arekojermos, para tornar. Me akodro mos trayiyan kuvos de agua para alimpyar los piezes de la arena. Pagavamos para kada kuvo 25 groshes. Derken saliyamos de la plaj i ivamos a la estasyon de otobüs Florya-Taksim. De la kanserya del diya entero empesavamos a durmir en el otobüs. Solo un anyo bivimos este bulush. Despues ke empesi la eskola, de muevo empesimos a ir a Caddebostan, para pasar la enveranada. Agora esto pensando ke grande de lukso era ir a Caddebostan o a las izlas para pasar el enverano. En diyes puntos mos ivamos a la plaj. En vezes tornavamos kon mayo a kaza. A la semana unas kuantas vezes tornavamos kon talika. Si no era oras de midi ke no ivamos a komer, en vezes mos merkavan dondurma o misir. Eran muy ermozos anyos.
