Kaji mi vida adulta entera tuve el mazal de determinar mis oras de lavoro, i por esto, pudía organizar mis días komo me konviene: espertarme tadre, komer lo ke me plaze i kuando me viene la gana, eskrivir a media noche i echarme a durmir a la madrugada. Esto s'eskapó. Agora kale ke tome kuras en oras fiksas del día, i ke koma en oras fiksas, si tengo gana o no tengo gana. También s'eskapó komer todo lo ke me plaze... Asúkar - defendido. Sal - defendido. Arina blanka - defendido. Manteka i kezos godros - defendido... Bueno ke me plaze komer lentejas, garvansos, avikas, vedruras i pishkados de mar - estos son rekomendados para mi. Ademas el doktor me disho ke kale kaminar a pye presto, por una ora, sinko vezes a la semana. En el enverano de Israel esto se puede azer solo demanyana, antes ke se aga ocho la ora.
En estos días m'estó alevantando antes de las sesh. Estó saliendo de kaza a las sesh i media i tornando a las siete i media. Salgo kon los "fones de oreja" para sintir múzika en kaminando. Kada día eskojo alguna lista de kantikas de Spotify. Anoche me sonyí kon mi madre. La vide asentanda en la tarasa de una kaza grande de marmol enriva de una montanya kuvierta de pinyoneros (komo ke ay en Estambol). Me disho: "No estés en kudiado achakes de mi, Aldiko, akí m'están mirando muy bueno i m'están kurando". M'espertí kon los ojos mojados. Kije alargar el suenyo. Metí la múzika ke le plazía a mi madre, kantikas fransezas de los anyos 50s i 60s, i salí de kaza.
Ocho-mueve puntos a pye para yegar a un parko chiko. El parko está fraguado debasho i enriva de una kolina chika. Yo entro ayá de la parte de abasho, i empeso a suvir las eskaleras ke yevan ariva. A lo largo de la suvida ay fuentizikas i pisinikas chikas ande mora un par de patos. Toda esta agua i la muchidumbre de arvolés azen un aver muy agradavle mizmo en enverano. Suvo i abasho las eskaleras kuatro vezes i do kuatro tornos del parko entero asta ke pasen 45 puntos. En estas oras el parko está yeno de djente, kaminando, korriendo, paseando kon sus perros, aziendo jimnastik o Tay-Chi. Ay un lugar kon instrumentos de jimnastik ke siempre están okupados. Kon el retorno a kaza pasa un poko mas de una ora de kaminar a pye.
