Este demanyana me alevanti un poko tadre. La noche no deviya de mirar la seria de television fina a la fin. Sovre todo, esta fruta seka ke komi mirando la televizyon me apezgo el stomago. En fin, Oy ya lo arekojo. Ma no tengo tiempo para azerme un chay. Me meti en kamino kon mi kave en el termos. Kuando ya ayegi a vinir al buro, los amigos me resivieron kon la golor del simit fresko, kayente kon un pedasiko de kezo. Los amigos me los ofresieron de korason i empesi a lavorar.
Teniya en penserio de komer mi komida en un ambiente trankilo i poko a poko, ma a las dodje en un punto un telefon rebolto todos mis planes. Una ora despues deviya de estar en una reunion en la otra punta de la sivdad. Tomi mi chanta i me echi a los kaminos. Kon mi otomobil era imposivle de arivar a tyempo; puediya alkansar trokando de metro en metro. En el kamino me merki un sandvichiko i me fuyi a la reunion ke paso kon muncho stres. Durante la reunion, bevi dos kaves.
A la tadre, kando vine a kaza, vide ke mi mujer aviya aprontado la meza kon grande alegria. En el mizmo momento avri la television; miri las novedades, sinti los problemes de kada diya de los ijos. No, no, esta noche no me vo echar tadre, ma despues de todo lo ke komi tanto i sin regula no era possible.
Ke el Profesor Karatay no sienta este program de alimentasion de kada diya. No so ni dietisien, ni koch de nutrision, ma kon este plano de komer, ke vengan los kolesteroles, las diabetes, ke vengan los batimyentos de korason... Si sosh de los ke dizen "komer es sinyo de salud", pensá un poko en las komidas de kada dia. Kuando un bebe tiene sesh mezes, ya empesamos a darle karota, patata, karne de kodrero, yogurt kon frutas, pishkado, poyo. Akodrávos ke azesh programes para la semana entera i finalmente el prensip es de darle lo ke es bueno para el puerpo. Todas las komidas ke se komen kaminando i en piyes, komo se kome sin mastikar, se dijera sin difikultad. Kuando mos asentamos para komer, muestro sistem de dijestion lavora de una manera mas kalma i kontrolada. Las komidas ke no se mastikan bastante trayen pezgadura al stomago. En el koryente de kada diya, komer en kaminando te gana tyempo, ma a la luenga de los diyas parese los malos efektos. En los ambientes kon stres, mientres ke se kome, el meoyo manda ondas negativas al estomago. En este kavzo, la dijestion del estomago se torna en modo negativo.
Otorizar a vuestro ijo ke no kere komer a mirar videos, distrayerlo kon djuguetes i "enkashar" las komidas en su boka, va azer en el futuro ke koman kon estos uzos. El se va anbezar de vozotros a arekojer su palto i meterlo al mupak i no koryer para mirar la televizyon. Kree djugos para estar mas tiempo uno al lado de otro es vuestro dover. En estos diyas ke las kalorias se kontan en kada momento, ande se meldan linyas para las vitaminas, ande las informasiones de "ke sirve para ke, o ke no sirve" las mezas puede ser un tiempo de alegria, esto sera mas saludozo para todos.
Nota: En estos tiyempo kero akordarme de mi eshuegra i demandar de muevo piadad para su alma. Despues de kada komida ke se gizava, diziya de korason: "En bueno ke se koma". Yo, me enfasyava, pensava: "Ya lo gizimos demanyana, ya lo vamos a komer a la tadre". Ma un diya teniya una vijita. De diya, meti toda mi maestria en medio i apronti una meza de las mas rikas. A la tadre, mos sakudimos kon la muerte de mi padre i no pudimos tomar la savor de meza "tan rika". Esto hue par mi una leson muy amarga. Para kada bokado ke gizo, lo repeto: "En bueno ke se koma".
