Roza, ija de Avram i Sará Leví, nasió en 1885 en Chirpán, un kazal en el Sud-Sentro de la Bulgaría, serka de la sivdad de Háskovo.
Sigún Wikipedia, la komunitá djudía de Chirpán se fondó en el siglo 19, i el kal de Chirpán se avrió en 1880 (5 anyos antes ke nasiera Roza). En 1900 avían en Chirpán 150 djudiós.
Roza se kazó kon Yusef Leví, ijo de Izak i Kalo, ke (sigún los dokumentos turkos) nasió en Edirne en 1880. No se en ke anyo se kazaron, ma sus primer ijo, mi granpapá Alber (Avram) nasió en 1909. La sigunda, Sará, nasió en 1910, el treser, Arón, nasió en 1913, i el kuatrén, Izak, en 1917.
Roza i Yusef tenían en el kazal una botika ande vendían ropa ke trayían de la sivdad. Yusef tenía una arabá de kavayo i en el tiempo de las gerras de los Balkanes (1912-1913) transportava refujiados turkos, bulgaros i gregos i los yevava a traverso de las frontieras ke se trokavan de día en día.
En la primera gerra mundiala, lo tomaron a Yusef al askerlik. Kuando tuvo haber ke su mujer Roza parió un ijo, arogó ke le den konjé para verlos, ama no le dieron. Salió sin permisión. Malorozamente, una mujer del kazal ke tenía un liezón kon el komandante de la kazerna lo vido a Yusef i lo denunsió. Le dieron pena ke kede en pies toda la noche afuera, en la inyeve. Yusef se izo hazino i se murió.
Roza era una mujer muy korajoza. Sigún un kuento de famiya, pedrió un dedo de su mano derecha en protejando a sus 4 kreaturas de un lovo, ke un día de invierno, achakes de una inyeve muy fuerte, abashó de la montanya i vino serka de sus kaza.
Después de la muerte de su marido, i antes ke eskapara la gerra, Roza tomó la arabá de su marido defundo, i kon sus 4 kreaturas i kon Hayim Lodrig, un guerfanó de gerra de 12 anyos ke le ayudava kon los kuentos de la botika, salieron al kamino para Edirne, ande morava su ermano. Era un viaje muy duro. Para ke puedan komer Roza devía de “untar la mano” de los soldados, ke en akeyos días solo eyos tenían proviziones i el puevlo estava ambierto.
Roza i sus ijos bivieron en Edirne asta 1934. En akel anyo, komo munchos djudiós, se desplasaron a Estambol achakes de la "furtuna" - los evenimientos kontra los djudiós en la Trakya. Se instalaron en el kuartier de Kuzguncuk (prononsiado por mozotros 'Kuskundjuk') al bodre asiatiko del Bosfor.
La ija de Roza, Sará, se kazó kon Hayim Lodrig (el guerfanó de gerra) i tuvieron dos ijas i dos ijos: Izak, Ojení, Roza i Yusef.
Alber (mi granpapá) se kazó kon Inés (nasida Sultana) Koén, i tuvieron una ija regalada, Roza (mi madre) ke nasió en 15/11/1936. Inés se murió en 25/5/1938, i mi madre se kedó guerfaná de madre a la edad de un anyo i medio. Mi granpapá se kazo otrunas tres vezes en su vida (de la sigunda se kitó, de la tresera se embivdó i kon la kuatrena se murieron endjuntos en un aksidente de otomobil) - ama no tuvo otros ijos mas ke mi madre.
Arón se kazó kon Ester Lilo, i tuvieron una ija i un ijo, Suzi (ke la yamaron al nombre de mi gramamá Sultana) i Yusef.
Izak se kazó kon Diamante, i tuvieron una ija i un ijo, Roza i Fiko (Yusef).
Roza avía deshado en Chirpán una ermana, Liza, ke no la vido asta 1950. Liza i su famiya emigraron a Israel en 1949, i Roza se fue a Israel komo turista para verlos i siguro ke también ver la maraviya de la mueva mediná de los djudiós. Dizen ke trusho de Estambol una kasha grande yena de konduchos, i dio la yave a Solchi, la mujer de su sovrino ke era la patrona de la famiya. Esta Solchi la tengo visto en 1973, kuando mi granpapá i su tresera mujer, Hacer Hanım (era turka) vinieron a vijitarmos un poko después de muestra aliyá. Mos fuimos endjuntos a Yafo para vijitar a los primos bulgaros.
Roza se murió en 1962, a la edad de 77 anyos, i está enterrada en el bedahayim de Kuzguncuk.
La istoria de Roza la fraguí de lo ke me kontaron su inyeta Suzi Liber Levent-Levi, sus bizinyetas Tina Tsarfati (mi ermana) i Sara Eller (nasida Lodrig) i Aneta Rodrik, la almuera de su ija, Sará.
