A los dizimueve anyos, Sophia gasto las primeras paras ke gano en una koza ke nunka puediyamos pensar: dar una alkunya a su ermana chika.
Otra mujer si era, kon estas paras se merkava vistidos karos, djoyas valorozas o una kazika ermoza en Roma.
Ma Sophia Loren teniya una prioridad enteramente diferente. Eya no gasto akeyas paras ke gano kon tanto sudor por eya mizma.
Sophia i su ermana chika, Maria, aviyan nasido afuera de kazamiento.
El padre de eyas, Riccardo Scicolone, era un ombre de famiya novle ke al prinsipio le dio a Sophia su alkunya. Ma, kuando la madre kedo prenyada de muevo kon Maria, el disho ke no es su ija, abandono la famiya enteramente i refuzo de dar su alkunya a la chika nasida.
En akeyos diyas, ser nasido afuera de kazamiento era una grande verguensa. Maria fue eskrita en los livros del governo kon la alkunya de su madre, Villani. Komo las dos ermanas teniyan alkunyas diferentes, el puevlo entendiya de punto la doloroza verdad de la famiya. Maria enkontrava diskriminasion en la eskola i en la vida de kada diya. Se sintiya ke tiene una mancha ke eya no aviya echo nada por mereserla.
Sophia la keriya muy bien a su ermana i la estava viendo sufrir. La dolor de ver a Maria yorar porke el padre la refuzo, le estava kemando el korason. Kuando Sophia empeso a tomar las primeras paras del teatro, no penso ni un minuto. Bushko a su padre biolojiko i le ofresio una suma. Le disho "Toma estas paras i dale a mi ermana tu alkunya".
El padre, ke estava en estrechuras de paras, aksepto el trato. Tomo las paras, afirmo los papeles ofisiales, i asiguro de manera legal a Maria komo su ija.
"Yo merki para mi ermana el derecho de ser Maria Scicolone," disho mas tadre Sophia.
Kon este solo akto de korason limpio, Maria Villani se torno en un punto a Maria Scicolone. A la fin, eya partajo la mizma alkunya kon su ermana grande. No era por kavza de estatuto, ni por orgolyo; era por protejar su ermana de la djuzgaduria kruela del mundo. Sophia empleyo las primeras paras ke gano no por engrandeser su manera de bivir, ma por darle a su ermana dinyidad, igualdad i apatronarse la alkunya a la kual teniya el dirito.
Este sakrifisio kreo una atadura rezia entre las dos mujeres ke duro toda la vida. Maria kedo al lado de su ermana komo su mas serkana enkonfiyada, su mas grande enkorajadora i su mijor amiga en las ravias i en las alegriyas.
Kuantos anyos duspues, kuando las luzes briyantes de Hollywood se amataron i los tapetes koloradas se arekojieron, fue este akto kayado de devosion de ermana ke kedo komo la djusta ovra maestra de la vida de Sophia.
El mas grande regalo ke podemos dar, es el ke sana un korason roto.
