Mayo es una rama de flores freskas. Los korasones estan muy alegres. Este mez traye kon si, el dezeo de estar un poko mas en el ayre libre, de eksplorar un poko mas, los artes, konsertos, ekspozisyones, los filmos de festivales… La ajenda kultural i artistika de Estambol se enrikese en este mez.
Una noche en una shena de un theatro, el dia vinidero en un salon de konser mos enkontramos en mundos kompletamente diferentes.
Aktuasyones inspiradas, istoryas ke invitan a la refleksyon, i esta yeno de momentos akompanyados de buena muzika. Mayo deveria de ser un mez para eksplorar lo ke la sivdad tyene para ofreser, krear un espasyo para mozotros mizmos, abashar un poko el ritmo i desharmos yevar al tyempo.
Kon el mez de mayo, la naturaleza toma kolor de la vida, las flores i los arvoles empesan a enfloreser. Kon este mez deshimos el friyo del invyerno. Los pasharos tornaron atras, las bestyas se espertaron de sus esfuenyos.
El nombre de mayo, vyene del nombre de la diosa grega vyeja “Maia”. Eya es la mas grande entre los syete ermanos i se save ke traye vida a la tyerra.
Eurovision se selebra kada anyo en el mez de mayo.
Se dize ke los ke nasen en el mez de mayo son mas reushidos en la vida. El edifisyo “Empire State” se avyo el 01.05.1931. Kuando se fraguo era el mas alto edifisyo del mundo. Mayo es el solo mez kuando no se muryo dingun prezidente amerikano.
El mez de mayo tyene dos flores de nasimyento: el lirio de los valles (müge), i la flor de espina blanka. La flor de espina blanka reprezenta la esperansa. El lirio reprezenta la felisidad i la dulsor.
En mizmo tyempo en mayo se fyesta tambyen el dia de las madres ke son unikas. El dia de las madres sinyifika, el amor, el esforso, la dedikasyon de las mamas. Aktualmente, esta fyesta es una de las mas emportantes kaji en el mundo entero. Miles de famiyas aprovechan para konbivir, regalar flores, organizar komidas i agradeser a las madres ke lavoran i koryen kada momento para sus famiyas.
El dia de la Madre tyene raises ke se remontan a sivilizasyones antiguas ande se onorava la figura materna komo simbolo de vida i fertilita.
Este dia es espesyal porke mos permete de amostrar muestro amor a las figuras maternas en muestras vidas. Es un dia dedikado a rekonoser i agradeser el amor inkondisyonal, el sakrifisyo i el apoyo ke muestras madres mos dan a lo largo de muestras vidas. Es una oportunita para ekspresar gratitud unika i profonda ke kompartimos kon eyas.
- El uniko amor en el ke kreo, es el amor de una madre por su ijo.
- El abraso de una madre es uniko.
- Sin el amor de las madres no puedriya sovrebivir la rasa umana.
