El Dr. Sami Shawkat, funksyonaryo del Ministeryo de Edukasyon en los anyos 1933-1941, dirijo «al-Futuwwa», una organizasyon ke imitava las Juventudes Hitlerianas. En uno de sus diskorsos «La profesyon de la muerte», konsejo a la juventud irakyana de adoptar el stilo de vida de los nazifashistas. En otro diskorso, kalifiko a los Djudios komo enemigos internos ke deviyan ser tratados komo tal. En otro diskorso, konsejó imitar a Hitler i Mussolini para destruir el enemigo djudio.
El ambasador alman, Dr. F. Grobba, distribuyo fondos, filmos, livros i panfletas nazis en la kapital de Irak, finansyando los ultra-nasyonalistos. Grobba tambyen publiko Mein Kampf en arabo. El i su grupo de kolaboradores almanes tuvyeron una influensya sinyifikativa sovre el governo i munchos sektores de la povlasyon irakyana.
El primer akto antisemito tuvo lugar en Septiembre de 1934, kuando diez Dudios fueron destituidos de sus postos en el Ministeryo de Ekonomia. Despues, se establesyo una kota no ofisyal para el nombre de Djudios en la administrasyon publika.
En 1936, los sentimyentos antibritanikos i antisemitas empesaron a pujar. El Komite para la Defensa de Palestina distribuyo panfletos antisemitas. Durante kuatro semanas, de Septiembre asta Oktubre, tres Djudios fueron asasinados en Bagdad i Basra. El 27 de Septiembre, Yom Kipur, echaron una bomba kontra una sinagoga de Bagdad, ma no eksplozo. Tambyen echaron bombas kontra klubes djudios, i unas chetas atakaron a los Djudios.
El 1 de Junyo, primer dia de Shavuot, festividad en Irak tradisyonalmente markada por peregrinasyones a las tombas de santos i vijitas de famiyas i amigos, el rejente hashemita, Abd al-Ilāh, torno a Bagdad despues de su egzilyo en Transjordania. Un grande grupo de Djudios paso a la parte oeste del rio Tigris para dar la bienvenida al prens. En el kamino de retorno, un grupo de soldados, djunto kon siviles, atakaron a los Djudios, matando a uno i firyendo a otros. I ansi empesaron los rebelyones antisemitas en toda la sivdad, espesyalmente en el distrikto este del Tigris, ande biviya la mayoriya de los Djudios. A la noche, empeso un pogrom dirijido por soldados, grupos paramilitares juveniles i bandas/chetas. Los asasinatos i sakeos en las maales djudios i distriktos komersyales kontinuaron asta la tadre del dia sigiente, kuando el rejente finalmente ordeno a la polisiya de aretar i si nesesaryo tirar sovre los atakantes asta re-estableser el orden. Este pogrom fue konosido komo “Al Farhud”.
En el Farhud, 179 mujeres i ombres djudios de todas las edades fueron asasinados, 242 kriyaturas kedaron guerfanos, 586 negosyos fueron sakeados i 911 edifisyos ke abrigavan a mas de 12 000 personas fueron derrokados. El komite de investigasyon de la komunidad djudia estimo ke los danyos materyales eran aproksimadamente 680 000 liras inglezas.
El masakro de Farhud meneyo drastikamente la konfiyensa de toda la komunidad djudia irakyana. Munchos Djudios intentaron de konvensersen de ke lo malo aviya pasado. Ma la sombra de Farhud kedo prezente durante anyos.
