“Avre tu puerta serrada, Ken tu balkon luz no ay
El amor a ti te vela, partemos Roza, partemos de aki
Yo demandi por la tu ermozura komo te la dyo el Dyo
La ermozura tuya es pura, la meresko solo yo.”
Kon esta romansa de amor se avyo las luzes del oditoryum de la eskola i empeso el konser del 20en anyo del koro “NES” dospues de tanto tyempo.
Los eskrivanos del ŞALOM eskrivyeron eskritas yenas de komplimentos i remersyos a todos los ke penaron por este diya. Grasyas a todos esto mos aze alegrar i mos da koraje. Yo, en esta eskrita vos kero kontar, komo se realiza estas dos orikas kuando vos engleneatesh.
Primo, el shef i fondador del koro İZZET BANA, mos arekojyo en el mez de septiembre dospues de los yamim noraim. Ordeno el repertuar i kon la ayuda del profesor de kante NAZIM KERKEZ empesimos a kantar. Este anyo se unyeron amigas muevas, de sorte ke tomo tyempo de adaptarmos las vyejas koristas kon las muevas. Vino diyas ke kuatro oras kantimos la mezma kantika. Syempre digo, lavorar amatores kon profesyoneles no es muy fasil ni ambezar a kantar a mozos ke no savemos notas muzikales.
A İzzet i al profesor, el Dyo les dyo una pasensya ekstraordinarya para djignishear kon 28 mujeres de diferentes ideas. Los felisito i los remersyo de alma i de korason por sus penas. Entervalo de las provas, un ekipo tomo el dover de kualo mos vamos a vistir en la shena. Malgrado ke ya teniyamos muestras uniformas de los konseres de antes, este anyo İzzet kijo ke seya todo muevo. Los fostanes kale ke seyan shik, kale ke mos vaya a las godrikas komo yo, kale ke no seya muy karo, mas no alargo mis palavras, les salyo las grenyas del ekipo de vistimyentas, una grande felisitasyon a todas eyas. Komunikasyon kon el protokol, kon el puevlo, areglar el salon i los lugares de asentar, puedeser ke es lo mas difisil porke todos keren asentarsen delantre. Kon muncho repozo i esto lo parvinyeron el ekipo de organizasyon, entervalo kada djugeves no mankimos de las provas, prova kon los muzisyenes, prova kon los chikos prova kon los ombres, no entendimos komo mos pasaron las oras.
En fin ya vino el diya 17 de Mayo…
Dospues de la prova jeneral, estavamos byen kansadas, mos vistimos, mos fardimos, mos fotografyimos i asperimos el anunsyo de salir a la shena.
El kulis no vyene a kontar kale bivirlo, akea ora no ay otro penseryo, todas aunadas de un korason arogandomos reushita buena.
I las palmas…
Las palmas mos izo olvidar toda la kanserya.
Syempre teneremos la puerta avyerta, el Dyo ke mos ayege a fyestar el 50en anyo de arte de İZZET BANA.
ESTOS i MUNCHOS!
