Keridos i Keridas vos saludo kon grande eskarinyo.
Kuando el kalendario amostra el 1 de Junyo, todo se muda en la natura i en muestra alma. Los diyas eskuros i apretados del invyerno, el tiempo lokura de la primavera, todos se van i deshan el lugar a una sezon yena de enerjia i de alegriya. El enverano no es solo una sezon; es el espertar de la bendision i de la lucha de bivir ke tenemos aryento de mozotros. Es el momento de deshar atrás la fatiga de todo el anyo i de a suvir al piko de la pas i del repozo kon las vakansas kon grande enerjiya.
El sekreto del enverano esta en sus diyas largos i briyantes. El sol, kuando se va del sielo, no tyene adjile; nos da oras i oras de anchear el tyempo, por gostar de kada momento. El mas grande regalo de estos diyas largos es, sin duda, la mar i el sol ke mos kayenta la piel. Kando el bruido de las olas se djunta kon la kalor del sol, una neshama de felisidad entra al korason. Relaksarse en las aguas freskas goliendo la sal de la mar, es komo si toda la karga del invierno se kaye de los ombros en un momento.
Muevos Kaminos i la Savor de la Libertad
El enverano es tambien el tyempo de espertar a la kuryozidad ke tenemos aryento. No abasta solo repozarmos; irmos en kamino por deskuvrir un lugar muevo, una sivdad o un kazaliko ke nunka avesh visto antes, da una una alegriya desde la manyana. Pedrerse en las kalejas estrechas de un kazal de mar, kitar fotos de las kazas de pyedras adornadas kon rozas de begonvil, i bever un kafe en una chika botika de la kaleja, vos aze sentir ke estash bivyendo de vedrad. Kada muevo kaminiko es una ventana mueva ke se avre a la vida.
"El enverano es una sinfonia de libertad, ande la alma topa su propio kolor i el ritmo de la vida se aze mas presto."
Un Suenyo de Noche de Enverano al Bodre de la Mar
Kuando la kalor del diya desha el lugar a un ayreziko dulse de la tadre, empesa el ritual mas ermozo del enverano: una sena de alegriya en el bodre de la mar. Asentados en una meza ande las olas vyenen asta a tokar los pyes, endjuntos kon la famiya i kon los amigos es un trezoro ke no tyene presyo. En la meza, la enerjiya ermoza kon los pishkados freskos, los mezés kon azete de oliva i las rizas de korason; i el sielo mos akompanya en este kavzo.
Mientras el sol se va kaendo, pinta el sielo kon kolores de portokal, de rosa i de morado los mas ermozos. La superfisia de la mar se estira komo una savana klara delantre de los ojos, reluzyendo kon los refletos de la kaida del sol, del anocheser. Una muzika suave se meskla kon los sones de los platikos, pirones i kuchiyos i el esforso del ayre. Es uno de estos momentos ke dezeamos ke el tyempo se kede aya; sin adjile, gostando el momento, yeno de una pas i de saver ke estash aya.
El enverano mos sana a todos kon estas delisias ke mos da kon muncha jenerozidad. Alsar la enerjiya alta, desharse en los brasos de la mar, a la kalor del sol i al frio de los muevos kaminos. Bienvenido enverano, kon todas tus ermozuras, vas a azer muncho bien a muestra alma!
Enveranada buena kon sanedad i kon alegriya.
