Una chika fraza ke oyí de la boka de una kreatura chika troko de una manera profunda el senso de mi vida. A la kreaturika la moryo una bizba en la mano. La ijika teniya muncha dolor. Su padre le disho ansí: “La bizba te kero flor.” La kreatura sonriyo. Se sintio ermoza kon kolores ermozas. El padre no enyego la dolor, ma le dio un sensio diferente. La kreaturika kada vez ke va ver una bizba nunka se va akodrar del dedo ande la piko la bizba, se va akordar de la alegría sin mezura de ser komparada a una flor. Este sentimiento le alegro el korason i le metio una sonriza en la kara.
Los ijos nunka no se olvidan de las palavras de sus padres ni de los sentimientos ke estas palavras krearon en eyos. Es por esto ke todos savemos ke los paryentes tienen una responsabilidad muy grande. Muestros ijos ke abrasamos kon amor kuando se alevantan la demanyana kontinuan a sintir esta kalor de ariyento. I ansina ke kuando se van de kaza, kontinuan a sentir de mezmo, i van a kerer ke sus ijos tengan el mizmo amor de famiya. Al kontrario, las kreaturas ke se engrandesen en una kaza yena de dolores, toman su parte de la dolor i no pueden amostrar la piadad de menester a sus propios ijos. No kale olvidar los profesores ke son muy emportantes para krear el karakter de un persona. Una palavrika o un djesto abasta por la vida entera. Ansina es ke se forma el viaje de la vida.
Esperar ke la dolor pase toma tiyempo, ma para alivianar la dolor no ay menester de palavras demaziyas. Es komo amatar la luz en una kamareta. La luz esklarese la kamareta, i en akel momento, todas las kozas se ven de un modo diferente a muestros ojos.
En el diksionario, el senso de la palavra konsolasyon es, el intereso amostrado para alivianar la dolor o el korason roto. Este echo, ansina komo transmite el sentimiento de "no estas solo", manifiesta ke el anyudo ke se siente es natural. El uzo de palavras komo “deshalo”, “no te lo metas en la kavesa” es muy amurchante. Dizir “Deshalo ir” no konsola. Al kontrario, aharva en vaziyo al echo i te aze pensar ke sos indiferente. Ma en verdad, dar la espalda a la persona te va dar una dolor mas grande.
La konsolasyon kere dezir “esto aki”, “te entiendo”, “no estas solo”. La konsolasyon es la empatía. I la empatía te aze meterte en el lugar del otro para mirar kon antojos diferentes. Kuando se dize empatía, me plaze de akordarme de esta fraze: "Vístete los kalsados del otro i kamina por el kamino ande él kaminó. Mira ver si estos kalsados i estos kaminos te paresen fasiles i ermozos..."
Ay una palavra ke me plaze muncho: "Puede ser ke kada mujer no es una reyna, ma es la prinsesa de su padre. "Es por esto ke, kuando la bizba pika el dedo de su ija, al padre tambien le erguele el korason, ma el ve a su ija komo una flor, olvidandose de su propio dolor...
