La semana pasada vos konti una konseja de mi chikez sovre kuando viniyan a las kazas las kuzenderas. En pensando a estos anyos me vino al tino la primera klasa ke me fui asta la sinkena klasa, “Kurtulush İlk Okulu”. Akeyos anyos kuando mos ivamos a la eskola, mos vistiyamos prostela preta kon yakas blankas. Akeyos anyos las eskolas eran serka de las kazas. Dizeremos ke estas morando en Ferikoy o Kurtulush, aviya unas dos eskolas. Por esto mos ivamos a estas eskolas, en kaminando. No aviya servisyos komo agora. Porke agora estas morando en Goztepe i para la eskola te estas indo a Ulus. Komo ke se vayga un chiko de sinkena klasa este karar de kamino solo. En los anyos 1964, las klasas eran muy yenas, de 50 o 60 ijikos. En una sira asentados 3 personas lado kon lado. Era en dos periodos de edukasyon, sabahchi (los de demanyana) i öğlendji (los de despues de midi). Un anyo meldavamos sabahchi, al otro anyo eramos öğlendji. Mos davan de kaza sandvich, fruta, ets. Trayiyamos kon la chanta ke se yamava Beslenme Chantasi. En vezes me metiya mi madre, ke este en Ganeden borekitas o unas dos bulemas o un pedaso de Kek. De la eskola mos distribuiyan Leche. O sino polvo de leche. No me plaziya i no beviya. Oy dayinda no bevo leche kayente. Kada Lunes en primero empesava la eskola kon la seremoniya de alsar la bandyera. Todos keriyamos detener la bandyera o alsarla. Despues antes de entrar a las klasas mos aziyan kontrol los kaveyos i las unyas. Si eran largas mos mandavan a las kazas para ke korten los kaveyos. Aviya unas kuantas profoseras malas, eyas en la mano kon tijera kortavan de los kaveyos un pedaso para ke te vayas ovligado. Me akodro kada anyo una vez mos aziyan vaksina, diya de viernes. Kada vez me endjidava el braso i me saliya kayentura. Kodja pedaso de enjektor, en la una mano un paliko kon algodon i tenturdiyot. Ken yorava, ken se eskondiya, no aviya remedyo de fuyir. Mos aziyan el ashi/vaksina. En los antraktes saliyamos a la guerta. Los ijikos djugavamos a bala o a apanyar. Las ijikas djugavan en do tura 1-2-3. Aviya djugos komo “yağ satarım bal satarım”, “uzun eshek”, “kor ebe”, saklanbach, en 10 puntos del antrakt djugavamos i entravamos a la klasa kon las karikas koloradas i aryento del agua. Si teniyamos ambre abashavamos abasho al kantin, vendiyan aya simit, achma, ayran, tost i gofret. No aviya muncha rikeza. Kada diya no tomavamos del kantin. En vezes merkavamos.
Kuando mos asentavamos en la sira aviya todo modo de personas lado kon lado. En vezes kon el ijo del kapudji/portero, en vezes kon un ija de merkader i en vezes kon el ijo de un doktor. No teniyamos dinguna diferensya de parte a parte. Todos eramos amigos. En salyendo de la eskola, en la puerta se topava, turshudji, simitchi, shambalidji. Aryento de una araba kon vitrina vendiyan Kağıt Helva, susam i leblebi tozu. En la otra parte aviya Kokorechchi. En vezes vendiyan kastanyas asadas. La salidura de los elevos era komo djinisaros. Era una koza de ver. Enfrente de la eskola aviya kırtasiyedji. Si no teniyamos kalem o si lo peryimos la goma, si ay de menester de merkar karton o tefter entravamos i merkavamos. Teniya una golor muy ermoza aryentro del kırtasiyedji. Me parese era golor de papel. Keridos lektores, si me deshas vos puedo eskrivir mas muncho. No tengo muncho lugar. A la otra eskriturya vos konto otro konsejika Nostaljika.
